Թբիլիսիի քաղաքային դատարանը օգոստոսի 2-ի գիշերը բավարարել է դատախազության միջնորդությունը եւ հեռակա կարգով Վրաստանի նախկին նախագահ Միխայիլ Սահակաշվիլիի նկատմամբ՝ որպես խափանման միջոց ընտրել նախնական կալանքը, հաղորդում է newsgeorgia.ru-ն:
Խափանման միջոցի ընտրության շուրջ դատական նիստը 3,5 ժամ է տեւել: Հեռակա կարգով նախնական կալանք է ընտրվել նաեւ այժմ, Վրաստանի սահմաններից դուրս գտնվող գործի եւս երկու մասնակիցների՝ Վրաստանի արդարադատության նախկին նախարար Զուրաբ Ադեիշվիլիի եւ պաշտպանության նախկին նախարար Դավիդ Քեզերաշվիլիի նկատմամբ:
Միխայիլ Սահակաշվիլին, ով նոր նախագահի երդման արարողությունից հետո լքել է երկիրը, մեղադրվում է 2007թ.-ին բողոքի ցույցը ցրելու եւ «Իմեդի» հեռուստաընկերության գրասենյակի վրա հարձակման գործով: Հետաքննությունը վարում են Վրաստանի ՔՕ 333-րդ հոդվածի 3-րդ մասով (պաշտոնի չարաշահում տուժածի արժանապատվության ոտնահարմամբ):
Հայրենիքում Ադեաշվիլինի մեղադրվում է շահի համար պաշտոնեական դիրքի չարաշահման, բանտարկվածների նկատմամբ անմարդկային եւ ստորացուցիչ վերաբերմունքի կազմակերպման, քրեական գործի ապացույցների կեղծման եւ հանցագործության իրականացման հրահրման մեջ:
Ինչ վերաբերում է պաշտպանության նախկին նախարարին, ապա նրան առաջադրվել է մեծ չափերի կաշառակերության, մաքսային կաննոների խախտման, փողերի լվացման եւ կազմակերպված խմբի կողմից միջոցների յուրացման/վատնման մեղադրանքներ:
Գործով ձերբակալվել են նաեւ Վրաստանի նախկին վարչապետ Վանո Մերաբիշվիլին եւ Թբիլիսիի նախկին քաղաքապետ Գիգի Ուգուլավան: