Ադրբեջանին տրամադրվող ամերիկյան ռազմական ողջ օգնությունը պետք է դադարեցվի այնքան ժամանակ, քանի դեռ Ադրբեջանը չի հրաժարվել դիպուկահարների օգտագործումից: Այդ մասին հայտարարել է ԱՄՆ Կոնգրեսի ներկայացուցիչների պալատի անդամ Ադամ Շիֆը, հաղորդում է Հայ Դատի ամերիկայի հանձնախումբը:
Ամերիկացի կոնգրեսականը նշել է, որ Լեռնային Ղարաբաղի ժողովուրդը երկու տասնամյակների ընթացքում Ադրբեջանի կողմից մշտական սպառնալիքի եւ դիպուկահար կրակոցների տակ է գտնվում: Վերջինս փորձում է վերականգնել գլխավորապես հայերով բնակեցված տարածաշրջանի վերահսկողությունը: «Անցած շաբաթ ադրբեջանական ուժերը կրկին գրոհել են շփման գծում, ինչը հանգեցրել է երկկողմանի զոհերի: Բռնության այս վերջին կիրառումը պետք է խստորեն դատապարտվի եւ Ամերիկան պետք է կոչ անի Ադրբեջանի կառավարությանը դուրս բերել իր ուժերը եւ հրաժարվել դիպուկահարների օգտագործումից, հատկապես քաղաքացիական անձանց նկատմամբ: Պետք է դադարեցվի ամերիկյան ռազմական ողջ օգնությունը այնքան ժամանակ, մինչեւ Ադրբեջանը իրականացնի այս պահանջները», - ասել է կոնգրեսականը:
Ադամ Շիֆը հիշեցրել է, որ Հայաստանի նախագահ Սերժ Սարգսյանը եւ Ադրբեջանի նախագահ Իլհամ Ալիեւը հանդիպում են ծրագրում: «Սակայն եթե նրանց բանակցությունները արդյունավետ լինելու ինչ-որ հնարավորություն ունեն, ապա նախագահ Ալիեւը այնպիսի տոն պետք է ընդունի, որը բացարձակապես պետք է տարբերվի վերջին ժամանակների նրա նկատառումներից, երբ նա պնդում էր, որ Ադրբեջանը տիրապետում է «Լեռնային Ղարաբաղում ցանկացած օբյեկտի» ոչնչացման միջոցների», - հայտարարել է Շիֆը:
ԱՄՆ ներկայացուցիչների պալատի անդամը նշել է, Լեռնային Ղարաբաղը իր հայ քրիստոնյա քաղաքացիների նկատմամբ բռնությունը սատարող ռեժիմից ազատվելուց ի վեր փորձում է ժողովրդավարություն եւ շուկայական տնտեսություն կառուցել: «Բաքուն դրանց պատասխանեց նավթային բումով ֆինանսավորվող ռազմական հզորության ավելացմամբ, ինչպես նաեւ պատերազմական հռետորաբանության արշավով, եւ այնքան է իր քաղաքացիներին հայ արյան ծարավ դարձրել, որ ադրբեջանցի սպան ՆԱՏՕ-ի «Գործընկերություն հանուն խաղաղության» ծրագրի շրջանակներում գլխատեց իր հայ գործընկերոջը, եւ 2012թ. Հունգարիայից արտահանձնվելուց հետո ընդունվեց որպես հերոս եւ մայորի կոչում ստացավ: Ժամանակն է, որպեսզի Մինսկի խումբը ինքնահաստատվի այդ ձգձգվող եւ ավելի վտանգավոր վեճում: Լեռնային Ղարաբաղի ժողովուրդը իրավունք ունի որոշել իր ճակատագիրը առանց ադրբեջանական սպառնալիքների ու վտանգի, ինչպես նաեւ իրավունք ունի ապրել՝ չվախենալով դիպուկահարների՝ մեջքից հարվածներից», - եզրափակել է Ադամ Շիֆը:
