Ուկրաինայում շարունակում են աշխատել ավտոբուսների բոլոր հիմնական գործարանները: Այդ մասին NEWS.am-ի թղթակցին հայտնել է ուկրաինական «Ինտեր Ավտո Թրեյդինգ» ընկերության ներկայացուցիչ Անդրեյ Շպակը:
Մասնավորապես, աշխատում է Հայաստանում ավտոբուսների ամենահայտնի ուկրաինացի արտադրող «Բոգդան Մոթորսը»՝ Չերկասիի եւ Լուցկի գործարանների հետ: Աշխատում է այլ խոշոր արտադրող՝ «Էտալոն» ընկերությունը (Բորիսպոլի եւ Չերնիգովի գործարաններ): Գործում է նաեւ Զապորոժյեի ավտոգործարանը, նույնիսկ Չասովոյարսկի վերանորոգման գործարանը Դոնեցկի մարզում, որը «Գազելի» երկարացված շասսիի հիման վրա ավտոբուսներ է արտադրում:
Փորձագետը հավելել է, որ Ուկրաինայում լոգիստիկայի հետ կապված դժվարություններ չեն ծագի, ինչպես եւ ուկրաինական նավահանգիստներում: «Ուկրաինական ավտոբուսները Հարավային Կովկաս արտահանում են Իլիչեւսկի նավահանգստի միջոցով, իսկ այնտեղ որեւէ խնդիր չի ծագի: Այսպես, թե այնպես, մեր մատակարարած ավտոբուսները կամ պահեստամասերը ներառում են ապահովագրում, այսինքն աշխատում ենք դասական «CIF» սխեմայի համաձայն՝ բեռ, ապահովագրություն, բեռնափոխադրում»,- հավելել է Շպակը: