Ալիեւի քարոզչությունը քչերին է համոզում արտասահմանում, սակայն բովանդակազրկում է հենց նրա ժողովրդին: Այս մասին նշվում է ամերիկյան «Huffington Post»-ի հոդվածում:
Հոդվածի հեղինակը հիշեցրել է, որ Հայաստանի հետ վերամիավորման մասին կենտրոնական իշխանություններին ուղղված Ղարաբաղի դիմումը, ըստ էության, անտեսվեց, դրան հաջորդեցին Բաքվի ու Սումգայիթի ջարդերը: Պատերազմը հաղթանակով ավարտվեց 1994 թվականին, սակայն ծանր գնով, եւ բազմազգ Կովկասի քարտեզը դարձյալ ոտնատակ արվեց:
«Ադրբեջանը պետք է մի կողմ թողնի Հայաստանի դեմ թշնամական տրամադրությունը եւ երկրի միակողմանի շրջափակումը: Հայաստանի եւ Ադրբեջանի քաղաքացիական հասարակությունը պետք է բովանդակալից մշակութային ու կրթական փոխառնություն սկսի: Ալիեւն ու նրա մարդիկ պետք է վերջ տան Հայաստանի դեմ քարոզին. դրան արտասահմանում քչերն են հավատում, բայց այն բովանդակազրկում է հենց նրա ժողովրդին: ԱՄՆ-ն եւ Ռուսաստանը պետք է արագացնեն իրենց ջանքերը ԵԱՀԿ Մինսկի խմբի շրջանակում, քանի դեռ ուշ չէ: Հայաստանն ու Ադրբեջանը բավական տարածք ունեն, որպեսզի ապրեն ու զարգանան: Իսկ առանց մեկը մյուսի՝ այդ երկրներն ամբողջությամբ չեն իրականացնի իրենց ներուժը: Հարեւան Վրաստանի հետ Հարավային Կովկասում նրանք կարող են տնտեսական միջանցք ստեղծել, որը փայլուն օրինակ կդառնա ամբողջ աշխարհի համար:
Փաստը մնում է փաստ: Լեռնային Ղարաբաղը երբեք Ադրբեջանին չի վերադառնա՝ կամա, թե ակամա: Ժամանակն է խաղաղություն կառուցել: Հայերի, ադրբեջանցիների, վրացիների, թուրքերի համար ժամանակն է զարգացնել Կովկասը: Ցանկանան, թե՝ ոչ, այդ երկրները՝ հարավում գտնվող Իրանի հետ միասին, ավելի շատ ընդհանրություններ ունեն, քան տարբերություններ: Ալիեւի ու Սարգսյանի համարձակությունը նրանց բանակցությունների սեղանի շուրջ կբերի՝ հակամարտությունը մեկընդմիշտ լուծելու անկեղծ ցանկությամբ»,- նշվում է հոդվածում:
