NEWS.am-ը զգալի կրճատումներով ներկայացնում է «The Jerusalem Post»-ում հրապարակված հոդվածը, որի հեղինակը վերլուծաբան Դուգլաս Բլումֆիլդն է:
Թուրքիան մեկ քայլ առաջ կատարեց ծայրահեղական իսլամական պետություն եւ ահաբեկիչների հովանավոր դառնալու ճանապարհին, երբ Ռեջեփ Թայիփ էրդողանը երկրի առաջին ընտրված նախագահ դարձավ: Սա պետք է անհանգստացնի Վաշինգտոնին:
Թուրքիան ՆԱՏՕ-ի վաղեմի դաշնակիցն է, սակայն Էրդողանի կառավարման շրջանում այն ավելի մոտ է դարձել Իրանին եւ ծայրահեղական իսլամիստներին, մասնավորապես՝ «Մահմեդական եղբայրներին», ՀԱՄԱՍ-ին, եւ հնարավոր է՝ նույնիսկ «Իրաքի ու Լեւանտի իսլամական պետությանը» (ԻԼԻՊ): ԻԼԻՊ-ը Թուրքիայում ակտիվորեն մարդկանց է հավաքագրում: Այս մասին խոստովանել է Էրդողանի կառավարությունը, իսկ թուրքական եւ այլ լրատվամիջոցներ հայտնում են, որ Թուրքիան միջոցներ ու բժշկական օգնություն է ցուցաբերել տխրահռչակ ահաբեկչական խմբին:
Էրդողանն Իսրայելին մեղադրեց Գազայում ցեղասպանության համար, իսկ նրա արտգործնախարարն Իսրայելի գործողություններն անվանեց «էթնիկ զտումներ ու մարդկության դեմ ուղղված հանցագործություն»: «Ցեղասպանություն» եզրույթը փաստացի հայտնվեց առաջին համաշխարհային պատերազմի ընթացքում եւ դրանից հետո 1.5 մլն հայերի թուրքական պարբերական ջարդից հետո: Սա էթնիկ զտումների եւ հույների ու ասորիների զանգվածային սպանությունների մաս էր կազմում:
Երբ ԱՄՆի Կոնգրեսում Հայոց ցեղասպանության հիշատակի մասին բանաձեւ են առաջարկում, Թուրքիայի կառավարությունը խիստ զայրանում ու մեղադրում է հրեաներին: Նրա պաշտոնյաները զանգահարում են Երուսաղեմի իսրայելական կառավարությանը, ինչպես նաեւ Վաշինգտոնում գտնվող՝ բարձր վարձատրվող հրեա իրավաբաններին՝ պահանջելով խոչընդոտել դրան, ինչպես նաեւ՝ որպեսզի հրեա կողմնակիցները հեռացնեն իրենց անունները:
Ցեղասպանությունից հետո 100 տարվա ընթացքում Թուրքիան Օսմանյան կայսրությունից վերածվել է աշխարհիկ պետության, իսկ այժմ Էրդողանը ցանկանում է այն վերածել իսլամական պետության: Կոնգրեսը թուրք-ամերիկյան հարաբերությունների վերաբերյալ լուրջ լսումներ պետք է անցկացնի: Հարկավոր է մանրամասն հետազոտել Էրդողանի կողմից բռնատիրական իշխանության զավթումը, նրա կողմից ահաբեկիչներին աջակցությունը, նրա վստահելիությունը՝ որպես ՆԱՏՕ-ի դաշնակից, ինչպես նաեւ վստահելիությունն ամերիկյան հետախուզության, անվտանգության ու տեխնոլոգիաների մասին տվյալների փոխանակման գործում: