Թուրքիայի նորընտիր նախագահ Ռեջեփ Թայիփ Էրդողանի հակահայկական քաղաքականությունը խստանում է: Այդ մասին այսօր՝ օգոստոսի 18-ին, մամուլի ասուլիսի ժամանակ հայտարարեց Ռուբեն Մելքոնյանը:
Փորձագետի խոսքով՝ սա առաջին հերթին կապված է այն բանի հետ, որ 2015 թ. Թուրքիայում նախատեսվում են հերթական խորհրդարանական ընտրությունները եւ որպեսզի Էրդողանի կուսակցությունը սահմանադրական մեծամասնությունը հավաքի, անհրաժեշտ է սիրաշահել ազգայնական տրամադրություններով լցված ընտրազանգվածին:
Թուրքագետը նաեւ ուշադրություն հրավիրեց այն հանգամանքին, որ Էրդողանն արդեն հայտարարել էր, որ պետության ղեկավարի պաշտոնում իր առաջին այցը կլինի Ադրբեջան, որտեղ, ըստ Մելքոնյանի, պարտադիր կհնչեն թուրք-ադրբեջանական եղբայրության մասին բարձրագոչ հայտարարություններ եւ հակայակական շեշտադրումներ կարվեն:
Վերջապես, փորձագետն ուշադրություն հրավիրեց նաեւ նախկին վարչապետի քաղաքական դիմանկարին: «Եթե Աբդուլլա Գյուլը հայտնի էր առավել դիվանագիտական եւ զգուշավոր վարքագծով, ապա Էրդողանը միշտ հայտնի է եղել ոչ հավասարակշիռ հակահայկական, եւ երբեմն նույնիսկ հակաքրիստոնեական հռետորաբանությամբ»:
Հիշեցնենք, որ օգոստոսի 10-ին Թուրքիայի պատմության մեջ առաջին անգամ անցել են նախագահական ընտրություններ, որի արդյունքում հաղթել է երկրի վարչապետ Ռեջեփ Թաիփ Էրդողանը: