Ղրիմում ներդրումների նկատմամբ հետաքրքրություն են ցուցաբերում Չինաստանի, Թուրքիայի եւ Իսրայելի մեր գործընկերները, հաղորդել է ՌԴ նախագահին կից Ղրիմի հանրապետության մշտական ներկայացուցիչ Գեորգի Մուրադովը: Նրա խոսքով՝ ներկայացուցչությունում արդեն առաջին բանակցություններ են ընթացել թերակղզում չինական ներդրումների ներգրավման շուրջ, հաղորդում է «Kriminform»-ը:
«Չինացիները, ընդհանուր առմամբ, դրական են ընկալում Ղրիմի Հանրապետությունում Ռուսաստանի հետ փոխգործակցությունը», - ասել է Մուրադովը:
Նրա խոսքով՝ չինացի ներդրողները հետաքրքրված են տրանսպորտային ենթակառուցվածքի, էներգետիկ օբյեկտների շինարարության եւ էներգետիկ սարքավորումների արտադրության, ջրամատակարարման եւ օբյեկտների ոլորտներում համագործակցության մեջ: Չինացիները նաեւ պատրաստ են նպաստել բնակելի-կոմունալ տնտեսության ձեռնարկությունների եւ ագրաարդյունաբերական համալիրի զարգացմանը:
Նա նշել է, որ Չինաստանը միակ երկիրը չէ, որ պատրաստակամություն է հայտնել համագործակցել Ղրիմի հետ: «Նախաձեռնություն ու լայն համագործակցության պատրաստակամություն են հայտնում նաեւ Թուրքիան, Իսրայելը եւ Հեռավոր Արեւելքի որոշ երկրներ», - ասել է Մուրադը: