Կիբերհանցավորությունը ժամանակակից ամենասուր խնդիրներից է եւ համաշխարհային տնտեսությանը տարեկան 400 մլրդ դոլարի վնաս է հասցնում, հայտարարել է Բիշքեքում ԵԱՀԿ կենտրոնի ղեկավարի պաշտոնակատար Ջոն ՄաքԳրեգորը:
Օգոստոսի 19-ին Ղրղըզստանի լեռնային Իսիկ Կուլ լճի ափին ԵԱՀԿ հովանու ներքո տեղի է ունենում «Հանցագործությունները կիբերտիրույթում եւ հանցավոր եկամուտների լվացումը» միջազգային խորհրդաժողովը, որին մասնակցում են ֆինանսական հետախուզությունների ներկայացուցիչներ Կենտրոնական Ասիայի հանրապետություններից, ինչպես նաեւ Ռուսաստանից, Հնդկաստանից, Չինաստանից, Բելառուսից: Հանդիպմանը մասնակցում են փորձագետներ ԵՄ երկրներից եւ ԱՄՆ-ից, ինչպես նաեւ Ասիայի եւ Եվրոպայի երկրների ֆինանսական եւ բանկային կառույցների ներկայացուցիչներ, փոխանցում է «ՌԻԱ Նովոստին»:
«Այսօր կիբերհանցավորությունը հսկայական բացասական ազդեցություն է թողնում աշխարհի երկրների տնտեսական եւ սոցիալական զարգացման վրա: Կիբերհանցավորությունը համաշխարհային տնտեսությանը հասցնում է տարեկան ավելի քան 400 միլիարդ դոլարի վնաս: Միայն վերջին տարվա ընթացքում կիբերհանցագործները գողացել են շուրջ 300 միլիոն մարդու անձնական տվյալ: Կիբերհանցավորության եւ հանցավոր ճանապարհով եկամուտների լվացման դեմ պայքարը ցանկացած երկրի տնտեսական եւ սոցիալական կայունության եւ ֆինանսական համակարգի ամբողջականության անբաժանելի բաղկացուցիչն է», - հայտարարել է ՄաքԳրեգորը:
