Աբովյանի թիվ 1 դպրոցի բակում օգոստոսի 13-ին Գագիկ Սարգսյանի սպանության մեջ մեղադրվող Արտյոմ Զաքարյանը պնդում է, որ ինքը դիտավորյալ չի սպանել, պարզապես «թեթեւ խփել է»:
Ինչպես տեղեկանում ենք ոստիկանության լրատվական ծառայությունից, Արտյոմ Զաքարյանը Գագիկ Սարգսյանին հանդիպել է օգոստոսի 11-ի ուշ երեկոյան:
«Ես էդ մարդուն տեսել եմ դոսաֆի մոտ, շորերը թաց էին, ահավոր խմած էր, եկավ տրուբեն գրկեց, մնաց: Ես էլ որոշեցի օգնել, նստացրի բորդյուրին, ասի՝ հանգստացիր, լրջացիր: Հայհոյեց, ես էլ թեթեւակի խփեցի, ձեռքից բռնեցի տարա, պառկեցրի ու գնացի: Ես ոչ սպանել եմ, ոչ էլ բան»,- ոստիկաններին պատմել է Արտյոմ Զաքարյանը:
Նշենք, որ Գագիկ Սարգսյանի դիակը հայտնաբերվել է առավոտյան ժամը 07:50-ի սահմաններում: Դպրոցի խաղահրապարակից ոչ հեռու 40-50 տարեկան տղամարդ էր ընկած, բռնության վրա հետքեր չկային: Ըստ դատաբժշկական փորձաքննության՝ մահը վրա էր հասել գանգուղեղային վնասվածքի հետևանքով: Բացի դրանից՝ Գագիկ Սարգսյանին սպանել են ոչ թե հենց դպրոցի բակում, այլ քարշ տալով են դպրոցի հետնամաս բերել: Ժամեր անց ոստիկաններին հաջողվել էր պարզել, որ սպանությունը կատարել է Աբովյանի բնակիչ Արտյոմ Զաքարյանը: Նրան մեղադրանք է առաջադրվել Քրեական օրենսգրքի 104-րդ հոդվածի 1-ին մասով սպանություն: Նախաքննությունը շարունակվում է:
Մանրամասները՝ ոստիկանության պատրաստած տեսանյութում: