Հայ Ազգային Կոնգրեսը դատապարտում է ազատ մամուլի դեմ սանձազերծված արշավը:
Կուսակցության տարածած հայտարարության մեջ ասվում է. «Ինչպես հայտնի է, Հատուկ քննչական ծառայությունը հարուցված գործի «շրջանակներում» դիմել է դատարան՝ նպատակ ունենալով պարտավորեցնել iLur.am կայքին եւ «Հրապարակ» օրաթերթին՝ բացահայտել մայիսի 7-ին հրապարակված տեղեկատվության աղբյուրը: Հիշեցնենք, որ համաձայն այդ տեղեկատվության, Շիրակի մարզի ոստիկանապետը բռնություն էր գործադրել գյումրեցի ճանաչված մարզիկ, հունա-հռոմեական ոճի ըմբիշ, օլիմպիական խաղերի մեդալակիր, Եվրոպայի եռակի չեմպիոն Արթուր Ալեքսանյանի նկատմամբ:
Այս անհեթեթ դատական գործընթացի դեմ եւ ի պաշտպանություն iLur.am կայքի եւ «Հրապարակ» օրաթերթի հանդես են եկել մի շարք կազմակերպություններ, այդ թվում ԵԱՀԿ-ն, Մամուլի ազգային ակումբը, Ինֆորմացիայի ազատության կենտրոնը եւ այլն: Ամբողջ աշխարհում աղբյուրի խորհրդապահության ինստիտուտը համարվում է լրագրողական մասնագիտության անկյունաքարերից մեկը եւ մեծ հաշվով լրագրության իմաստը: Չլիներ այն, այսօր աշխարհի որեւէ երկրում բացահայտված չէին լինի եւ հասարակությունների սեփականությունը չէին դառնա իշխանությունների կողմից գործված հանցանքների, ապօրինությունների եւ իշխանազանցությունների մասին բազում փաստեր: Աղբյուրի բացահայտման անհրաժեշտություն կարող է առաջանալ բացառապես ազգային անվտանգությանն առնչվող իրավիճակներում, երբ դրա բացահայտումը կարող է կանխել տվյալ պետության կամ հասարակության համար էլ ավելի վտանգավոր հետեւանքներ:
Սերժ Սարգսյանի ղեկավարած վարչախմբի կողմից իրավական առումով անգրագետ եւ լկտի հարձակումը վերը նշված լրատվամիջոցների վրա ունի մեկ նպատակ. կասեցնել կամ հնարավորինս բարդացնել իրենց վերահսկողությունից դուրս գտնվող ԶԼՄ-ների կողմից նույն վարչախմբի գործած հանցանքների ու ապօրինությունների հրապարակայնացումն ու լուսաբանումը, ինչպես նաեւ վախեցնելու միջոցով հետ պահել մյուս լրատվամիջոցներին նմանօրինակ գործունեությունից:
Հայ Ազգային Կոնգրեսը դատապարտում է ազատ մամուլի դեմ սանձազերծված այս արշավը եւ կոչ է անում Հայաստանի, ինչպես նաեւ միջազգային իրավապաշտպան եւ լրագրողական ընկերակցություններին սատար կանգնել թիրախ դարձած լրատվամիջոցներին»:
