«Կանազի գործով» ամբաստանյալ Ռազմիկ Մանուկյանի մայրը՝ Աննա Կարապետյանը, պնդում է, որ Կանազի կայազորային կլինիկական հիվանդանոցի բժիշկների եւ այնտեղ բուժվող զինծառայողների միջեւ ծեծկռտուքը բժիշկների հարբած լինելու պատճառով է սկսվել:
«Բժիշկները Ռազմիկին գցել են գետնին եւ սկսել են ծեծել, երեխես էլ ցավից սեռական բնույթի հայհոյանքներ է սկսել տալ: Ես կասեմ, որ էրեխեքը խմած չեն եղել դեպքի օրը: Բժիշկները 5 հոգով հարբած մտել են, սկսել են խփել, էրեխեքին ծեծել: Ինչի՞ բժիշկներին չեն հարցաքննում. իրանք են խմած եղել, ոչ թե երեխաները»,- այսօր՝ օգոստոսի 20-ին, կայացած դատական նիստից հետո լրագրողների հետ զրույցում ասաց Աննա Կարապետյանը՝ նշելով, որ հնարավոր չէր, որ բուժվող զինծառայողներն իրենց մոտ ոգելից խմիչք ունենային, ինչպես պնդում են բժիշկները:
Տիկին Աննան նշեց, որ իր տղան հոգեկան խնդիրներ է ունեցել, որը, սակայն, հաշվի չեն առել եւ զորակոչել են ժամկետային պարտադիր ծառայության:
«Իմ էրեխեն ուղեղի հետ խնդիրներ ունի, ինքն իր թեւերը փրթում էր: Բանակ տանելուց 3 ամիս հետո բերեցին Կանազի հոգեբուժարան ու թղթերի մեջ գրեցին, որ պիտանի չէ ծառայության համար»,- ասաց Աննա Կարապետյանը:
Ամբաստանյալի մոր խոսքով՝ բժիշկները դատարանում ճշմարտությունը չեն ասում եւ հակասում են իրենց տված նախաքննական ցուցմունքներին:
«Իրենք իրենց ցուցմունքներում գրել են մի բան, դատարանում մեկ այլ բան են ասում: Իմ տղեն չի ասում կռվի իրական պատճառը, քանի որ գիտի, որ քաղցկեղով հիվանդ եմ, խնայում է ինձ»,- ասաց Աննա Կարապետյանը՝ նշելով, որ բժիշկներն իրենց ցուցմունքներում գրել են, որ Ռազմիկին տապալել են գետնին, սակայն չեն ծեծել:
Նշենք, որ ամբաստանյալները, որոնք հոգեկան խնդիրների պատճառով բուժվում էին հոգեբուժական բաժանմունքում, պնդում են, որ բժիկները հարբած են եղել դեպքի պահին եւ հենց նրանք են հրահրել ծեծկռտուքը: Մինչդեռ բժիշկները պնդում են, որ բուժվող զինծառայողները հարբած են եղել եւ անկարգություններ են կազմակերպել, ծեծել բժիշկներին եւ փախել հիվանդանոցից։
Հիշեցնենք, որ Արշակ Թորոսյանին, Ռազմիկ Մանուկյանին, Դավիթ Մարկոսյանին մեղադրանք է առաջադրվել այն բանի համար, որ նրանք ստացիոնար բուժման մեջ գտնվելով զորամասի հոգեբուժական բաժանմունքում բաժանմունքի 2-րդ հարկի հիվանդասենյակում, 2013թ. նոյեմբերի 2-ին բռնություն գործադրելու սպառնալիքներ են հնչեցրել զինվորական ծառայության պարտականությունները կատարելու կապակցությամբ իրենց դիտողության անող զորամասի (հոսպիտալի) հրամանատար, փոխգնդապետ՝ Սահակ Օհանյանի, բժիշկներ, մայորներ՝ Վաղինակ Հովհաննիսյանի, Արմեն Հովսեփյանի, Լևոն Բալայանի և Էմիլ Բաբաջանյանի հանդեպ, բռնություն են գործադրել Սահակ Օհանյանի նկատմամբ՝ քաշքշել և պատռել նրա շապիկը, ապա կողապահարանները նետել են բժիշկների ուղղությամբ ու փախուստի դիմել։ Մեկ օր անց կայազորի կլինիկական զինվորական հոսպիտալից փախուստի դիմած 4 զինծառայողներն էլ հայտնաբերվել ու վերադարձվել էին հոսպիտալ։ Զինծառայողների նկատմամբ հարուցվել է քրեական գործ՝ ՀՀ քրեական օրենսգրքի 358-րդ հոդվածի 3-րդ մասի 1-ին կետով:
