Ամերիկյան Նյու Մեքսիկո նահանգի Ալբուքերք քաղաքում տղամարդը թալանել է 94-ամյա քաղաքացու, այնուհետեւ սափրվել ու լոգանք ընդունել զոհի տանը: 43-ամյա կասկածյալ Ռուդի Չավեսը, որին բռնել են թողած մատնահետքերի արդյունքում, ձերբակալվել է: Այս մասին հաղորդում է ամերիկյան «ABC» հեռուստաալիքի կայքը:
Քրեական գործի համաձայն՝ Ռուդի Չավեսը, զենքով սպառնալով Գլեն Միլերին, լոգանք է ընդունել, սափրվել, հագել Միլերը հագուստը, հետո հեռացել նրա մեքենայով՝ իր հետ տանելով հեռուստացույցն ու գումարը: Գողը տարեց տղամարդուն ասել է, որ թալանում է, քանի որ վերջերս է բանտից ազատ արձակվել եւ չի կարողանում աշխատանք գտնել:
Քննիչները գողի անձը պարզել են մատնահետքերի միջոցով, որոնք նա թողել է բերանը ողողելու հեղուկի շշի եւ ածելու վրա: Հանցագործի դեմ մի շարք մեղադրանքներ են ներկայացվել, այդ թվում՝ մարդու առեւանգում: