Վրաստանի գլխավոր դատախազությունն օգոստոսի 20-ին քրեական գործ է հարուցել Խորհրդարանի նախկին խոսնակ, ներկայում խորհրդարանական փոքրամասնության առաջնորդ եւ «Ազգային միացյալ շարժում» կուսակցության ներկայացուցիչ Դավիթ Բաքրաձեի նկատմամբ: «Նովոստի Գրուզիա»-ի փոխանցմամբ՝ նրան մեղադրում են ապօրինի միջոցներն օրինականացնելու եւ գույքի հայտարարագրման փաստաթղթերում սխալ տվյալներ լրացնելու համար:
Գլխավոր դատախազության համաձայն՝ քրեական գործ հարուցելու համար հիմք է հանդիսացել վրացական լրատվամիջոցներում տարածված տեղեկությունն այն մասին, որ 2014 թվականի հուլիսի 28-ին Դավիթ Բաքրաձեն եւ նրա կինը HSBC բանկի բրիտանական գրասենյակում փակել են իրենց հաշիվները, որոնցում 276.849 ֆունտ սթեռլինգ է եղել, եւ այդ գումարը փոխանցել են բանկային այլ հաշիվների: Լրատվամիջոցները նաեւ տեղեկությունը հաստատող փաստաթղթեր են հրապարակել:
«Քանի որ լրատվամիջոցներում տարածված տեղեկությունը հանցագործության նշաններ էր պարունակում, Վրաստանի գլխավոր դատախազության քննչական բաժնում հետաքննություն է սկսվել»,- նշված է դատախազության հայտարարության մեջ, որում նաեւ պարզաբանվում է, որ գումարի չափը զգալիորեն գերազանցում է Դավիթ Բաքրաձեի եւ նրա ընտանիքի անդամների եկամուտները, որոնք արձանագրված են պաշտոնատար անձի սեփականության մասին ամենամյա հայտարարագրման փաստաթղթերում: Դրանցում նաեւ տեղեկություն չկա բանկային այդ հաշիվների եւ դրանցում դրամական միջոցների առկայության մասին:
«Հետաքննության շրջանակում, որը տարվում է Վրաստանի Քրեական օրենսգրքի 355 հոդվածի եւ 194 հոդվածի 3-րդ մասի համաձայն, Գլխավոր դատախազության՝ եկամուտների ապօրինի օրինականացման դեմ պայքարի վարչության քննչական բաժինը կուսումնասիրի ինչպես լրատվամիջոցների տարածած փաստաթղթերի իսկությունը, այնպես էլ դրանցում արձանագրված միջոցների օրինականությունը»,- նշվում է հայտարարությունում: