Հայաստանի ֆինանսների նախարարությունը Երեւանում Կարեն Դեմիրճյանի անվան մարզահամերգային համալիրի աշխատակիցների աշխատավարձերի պարտքերը չի մարի: Այդ մասին այսօր՝ օգոստոսի 21-ին, լրագրողներին հայտարարեց Հայաստանի ֆինանսների առաջին փոխնախարար Պավել Սաֆարյանը:
«Հարցը ի սկզբանե ճիշտ հասցեագրված չէ: Մարզահամերգային համալիրը պետական կազմակերպություն չէ, ուստի մենք որեւէ առնչություն չունենք՝ աշխատավարձերն այնտեղ ինչպե՞ս եւ ե՞րբ են վճարվում: Խնդրում եմ հարցերն ուղղեք ըստ նշանակության», նշեց Սաֆարյանը:
Հիշեցնենք, որ ՀՀ ԱՆ ԴԱՀԿ-ն արդեն 5 անգամ աճուրդի է հանել Մարզահամերգային համալիրը, եւ ամեն անգամ գնորդ չհայտնվելու պատճառով 10 տոկոսով իջեցրել մեկնարկային գինը; Նշենք, որ ՄՀՀ-ն աճուրդի է հանվել դատարանի որոշմամբ՝ որի համաձայն ՄՀՀ-ից հօգուտ Հայաստանի Հանրապետության՝ պետք է բռնագանձվի ավելի քան 10 մլրդ դրամ, որը ժամանակին համալիրի սեփականատեր «ԲԱՄՕ» ընկերությունը վարկ է վերցրել կառավարությունից՝ դրա դիմաց գրավադրելով համալիրի շենքն իր հարակից տարածքով, սակայն չի կարողացել կատարել իր վարկային պարտավորությունները: Ընկերության ներկայացուցիչները պնդում են, որ իրենց պարտքը մարելու հնարավորություն չեն տվել, իսկ ՄՀՀ-ն աճուրդի հանելու իրական նպատակն այն է, որ գինն այնքան իջեցնեն, մինչեւ իրենց «հարմար» գնով վաճառեն իրենց ցանկալի գնորդին: