Հայաստանը ցանկանում է հայ վրացական սահմանի կամուրջն անվանել Բարեկամության կամուրջ: Այդ մասին իր վրացի գործընկեր Իրակլի Գարիբաշվիլիի հետ համատեղ ճեպազրույցի ընթացքում հայտարարեց վարչապետ Հովիկ Աբրահամյանը:
Նրա խոսքով՝ Դեբեդի միջով Բագրատաշեն-Սադախլու անցման նոր սահմանամերձ կամուրջը նախատեսվում է անվանել հայ-վրացական բարեկամության կամուրջ: Նոր կամուրջը կառուցվում է Վրաստանի սահմանին հայկական անցակետերի արդիականացման ծրագրի շրջանակներում:
Ըստ 2013թ. մեկնարկած եւ 60 մլն եվրո ընդհանուր ծավալով ծրագրի՝ սահմանամերձ անցակետերը կհագեցվեն ժամանակակից եվրոպական տեխնիկայով: Ծրագիրը ֆինանսավորվում է Եվրամիության գրանտային միջոցների եւ այլ դոնորների վարկային միջոցների հաշվին: Այն իրականացնում է ՄԱԿ-ի զարգացման ծրագիրը, իսկ Հայաստանի կառավարության կողմից համակարգում է ֆինանսների նախարարությունը:
«Մենք ծրագրում ենք սահմանամերձ անցակետերը հագեցնել որոնման եւ ավտոմեքենաների վերահսկման համակարգերով եւ կիրառել «Մեկ պատուհանի սկզբունքը», որը կպարզեցնի սահմանամերձ եւ մաքսային վերահսկողության ընթացակարգերը», - ավելի վաղ հայտարարել էր ֆինանսների նախարար Գագիկ Խաչատրյանը:
