Հայաստանի բնապահպանության նախարարության համապատասխան աշխատանքային խումբն այսօր՝ օգոստոսի 21-ին, Արարատի մարզի Նորամարգ համայնքի տարածքում գործող «Արսեն Պետրոսյան» ձկնաբուծական տնտեսությունում մեծությամբ աննախադեպ՝ 170 լ/վ ջրթողունակությամբ ապօրինի ինքնաշատրվանող խորքային հոր է լուծարել: Ավելի վաղ այս տնտեսությունում 120լ/վ ջրթողունակությամբ եւս մեկ ինքնաշատրվանող ապօրինի խորքային հոր էր լուծարվել:
Բնապահպանության նախարարության մամուլի ծառայության փոխանցմամբ, այս տարվա հուլիսի 16-ից առ այսօր Արարատի մարզի ձկնաբուծական տնտեսություններում խորքային հորերը լուծարելու եւ փականային ռեժիմի բերելու արդյունքում 798 լ/վ խորքային ավազանի ջրի խնայողություն է եղել, ինչը տարեկան կազմում է 25.165.728 խորանարդ մետր
Հիշեցնենք, որ Կառավարության 2013թ. հոկտեմբերի 31-ի որոշման համաձայն, հանրապետության Արարատի եւ Արմավիրի մարզերում գոյություն ունեցող ապօրինի շահագործվող, ինքնաշատրվանող հորերի լուծարման աշխատանքների իրականացման համար Բնապահպանության նախարարությանը 107.497.4 դրամ է հատկացվել:
Ընդհանուր առմամբ, դրամաշնորհի շրջանակում մինչեւ 2014թ. հուլիսի 1-ն այս մարզերում լուծարվել են 19 եւ կոնսերվացվել՝ 26 հորատանցք՝ 310 լ/վ ջրաքանակով: Համայնքների եւ տնտեսվարող սուբյեկտների կողմից սեփական միջոցներով լուծարվել են 11, կոնսերվացվել՝ 34 եւ փականային ռեժիմի բերվել՝ 2 հորատանց՝ ընդհանուր 920 լ/վ ջրաքանակով:
