Երեւանի Երիտասարդության պալատի տեղում շինարարություն իրականացնելու մցույթը շահած կառուցապատողը դժվարություններ ունի: Այս մասին օգոստոսի 22-ին լրագրողներին հայտնել է ՀՀ քաղաքաշինության նախարար Նարեկ Սարգսյանը՝ ներկայացնելով պաշտոնավարման 100 օրվա արդյունքները:
«Սա շատ խոշոր նախագիծ է. մեծ հյուրանոցային համալիր, որի համար կպահանջվեն ֆինանսական խոշոր ծախսեր: Նախագիծն ընդունվել է, հաղթել մրցույթում, սակայն ֆինանսավորում չկա», - պարզաբանել է նախարարը: Ըստ Սարգսյանի՝ ինքն այնքան էլ հիացած չէ նախագծով՝ եւ որպես ճարտարապետ, եւ որպես պաշտոնյա:
Նշենք, որ նախագիծը չի հավանել նաեւ Հայաստանի ճարտարապետների միության նախագահ Մկրտիչ Մինասյանը, որը բազմիցս հայտարարել է, որ Երիտասարդության պալատը լավ վիճակում էր եւ քանդելու կարիք չկար:
Սարգսյանը հավելել է, որ նախարարությունը ձգձգվող շինությունների կառավարման միասնական ծրագիր չունի: «Սակայն մենք հետեւողականություն կցուցաբերենք, որպեսզի այս նախագծերը ավարտին հասցվեն», - հավելել է Սարգսյանը: