Սպասվում է, որ Թուրքիայի արտգործնախարար Ահմեդ Դավութօղլուն, ում թեկնածությունը նորընտիր նախագահ Ռեջեփ Թայիփ Էրդողանն առաջարկել է վարչապետի պաշտոնում, երկրորդական դեր է կատարելու, այն դեպքում, երբ նրա ղեկավարը ձգտում է իր նոր պաշտոնը դարձնել երկրում ամենաազդեցիկը:
Ամեն դեպքում, Դավութօղլուն հայտնի է որպես հավակնոտ մարդ, եւ անցյալում էլ Թուրքիան ականատես է եղել դեպքերի, երբ նախագահները ձգտել են, բայց չեն կարողացել վերահսկել իրենց վարչապետերին: Նման բովանդակությամբ հոդված է հրապարակել ամերիկյան «Fox News» հեռուստաալիքը՝ հղում կատարելով Associated Press-ին:
Էրդողանը հույս ունի, որ 55-ամյա քաղաքական գործիչը նույնքան հավատարիմ կլինի, որքան եղել է որպես վարչապետ Էրդողանի երկարատեւ պաշտոնավարման ընթացքում: Թուրք առաջնորդը չի թաքցնում նախագահի լիազորություններն ամրապնդելու իր հավակնությունները: Այս պաշտոնը երկար ժամանակ հիմնականում արարողակարգային էր:
Վերլուծաբանների կարծիքով՝ Էրդողանը ցանկանում էր բարեկամ վարչապետ նշանակել, ով իրեն թույլ կտա զգալիորեն վերահսկել կառավարությունը: Դավութօղլուի առջեւ խնդիր է դրվելու 2015 թվականի ընտրություններում ստանալ ձայների մեծամասնությունը, ինչը «Արդարություն եւ զարգացում» կուսակցությանը հնարավորություն կընձեռի փոխել Սահմանադրությունն ու Թուրքիայի քաղաքական համակարգը՝ այն դարձնելով նախագահական, ինչին այդքան ձգտում է Էրդողանը:
