Ռուսաստանը խորապես ցավում է, որ Լեռնային Ղարաբաղի հակամարտության չկարգավորված լինելը ուղեկցվում է մարդկային զոհերով, մարդկանց սպանությամբ , ընդ որում՝ ոչ միայն ռազմական բախումների ժամանակ: Այդ մասին հայտնել է Ռուսաստանի ԱԳՆ պաշտոնական ներկայացուցիչ Ալեքսանդր Լուկաշեւիչը, հաղորդում է ՌԴ ԱԳՆ պաշտոնական կայքը:
Հարցին, թե Ռուսաստանի հետ միասին ԵԱՀԿ Մինսկի խմբի համանախագահների «եռյակի» մեջ մտնող ԱՄՆ-ի եւ Ֆրանսիայի արտաքին քաղաքականության գերատեսչությունները վերջերս Կ. Պետրոյանի մահվան փաստով հայտարարությամբ են հանդես եկել, որը մեծ արձագանք ստացավ, ինչպիսի՞ն է ռուսական կողմի դիրքորոշումը, նա պատասխանել է. «Մենք խորապես ցավում ենք, որ Լեռնային Ղարաբաղի հակամարտության կարգավորված չլինելը ուղեկցվում է մարդկային զոհերով, մարդկանց սպանությամբ , ընդ որում՝ ոչ միայն ռազմական բախումների ժամանակ: Մեր խորին ցավակցությունն ենք հայտնում Կարեն Պետրոսյանի, ինչպես նաեւ զոհված այլ հայերի եւ ադրբեջանցիների հարազատներին եւ բարեկամներին: Անհրաժեշտ ենք համարում նմանատիպ միջադեպերի մանրակրկիտ հետաքննությունը:
Կողմերին կոչ ենք անում հետեւել 2010թ. հոկտեմբերի 27-ին Ադրբեջանի Հանրապետության, Հայաստանի Հանրապետության եւ Ռուսաստանի Դաշնության նախագահների Համատեղ հայտարարության՝ ԵԱՀԿ Մինսկի խմբի եւ Կարմիր խաչի միջազգային կոմիտեի աջակցությամբ զոհվածների մարմինների վերադարձման մասին դրույթների գործնական կիրառությանը»:
Նշենք, որ Տավուշի մարզի Չինարի գյուղի բնակիչ, 32-ամյա Կարեն Պետրոսյանին գերեւարել են օգոստոսի 7-ին, իսկ մեկ օր անց էլ ադրբեջանական կողմը տեղեկատվություն էր տարածել, որ հայ երիտասարդը «հանկարծակի» մահացել է «սուր սրտանոթային անբավարարությունից»: