Ռուսաստան-Վրաստան-Հայաստան երկաթուղային հաղորդակցության վերականգնումը պարտադիր ներառվելու է Աբխազիայի ղեկավարության աշխատանքային օրակարգում: Այս մասին NEWS.am-ի թղթակցի հետ զրույցում հայտարարեց Աբխազիայի խորհրդարանի հայ պատգամավոր Լեւոն Գալուստյանը՝ մեկնաբանելով Ռաուլ Հաջիմբայի՝ երկրի նախագահ ընտրվելու փաստը:
Նա հիշեցրեց, որ Ռաուլ Հաջիմբան, ինչպես եւ Աբխազիայի նախագահի մյուս թեկնածուները, Աբխազիայի տարածքով երկաթուղային հաղորդակցություն սկսելու կողմնակից էր:
«Մենք գիտենք, որ Ռուսաստանը նույնպես հետաքրքված է երկաթուղային հաղորդակցության բացմամբ, եւ այս հարցը դրված է աբխազական ղեկավարության առջեւ: Թեեւ, ինչպես ինձ թվում է, որոշումը ոչ Սուխումիում է, ոչ էլ Մոսկվայում, այլ Թբիլիսիում եւ այն որոշ երկրներում, որոնք բացահայտ հովանավորում են Վրաստանին՝ Արեւմտյան Եվրոպայի երկրներն ու ԱՄՆ-ն»,- նշեց Լեւոն Գալուստյանը: Աբխազական կողմը, ըստ նրա, բազմիցս հայտարարել է, որ պատրաստ է նպաստել երկաթուղու վերականգնմանը:
«Սակայն, ամեն դեպքում, Աբխազիան պետք է ներկայանա հավասար պայմաններում: Աբխազական կողմի հետ որեւէ խնդիր չկա: Գլխավոր այն է, որպեսզի համաձայնի Վրաստանը, սակայն մենք պարզ գիտակցում ենո, որ երկաթուղու բացումը նշանակում է Ռուսաստանի դերի ու ազդեցության աճ տարածաշրջանում, իսկ Վրաստանն ու Եվրոպան չեն ցանկանում հովանավորել դա»,- եզրափակեց Աբխազիայի խորհրդարանի հայ պատգամավորը:
Հիշեցնենք, որ օգոստոսի 24-ին Աբխազիայում արտահերթ նախագահական ընտրություններ անցկացվեցին: Երկրի Կենտրոնական ընտրական հանձնաժողովի նախնական տվյալների համաձայն՝ ընտրություններում հաղթել է նախկին վարչապետ Ռաուլ Հաջիմբան: Առաջին փուլում նրա օգտին քվեարկել էր ընտրողների 50.57 տոկոսը: