Հայաստանում եզդիներին օգնելու համար հավաքագրված գումարը Իրաքի եզդիներին փոխանցելու համար օգոստոսի 27-ին մի խումբ եզդիներ կմեկնեն Իրաքի թուրքական սահմանի եզդիական գյուղեր: Եզդիներին ուղեկցելու է նաեւ «Հայազն» կուսակցության սնդամ Վահե Մելքոնյանը։
«Այս պահի դրությամբ Իրաքի մուտքի վիզաներ չունենք, փաստաթղթերի խնդիր կա: Բայց ամեն դեպքում չորեքշաբթի գիշերը դուրս ենք գալիս: Եթե անգամ չստացվի գնալ Իրաք, Իրաքի թուքական սահմանի եզդիական գյուղեր հասնելու ենք, այնտեղ հազարավոր փախստականներ կան: Մնացած հարցերը տեղում կկազմակերպենք»,- NEWS.am-ի հետ զրույցում ասաց «Սինջար» եզդիների ազգային միավորում ՀԿ նախագահ Բորիս Մուրազին:
Բորիս Մուրազին տեղեկացրեց, որ մեկ շաբաթ տեւած դրամահավաքի արդյունքում մոտ 10 հազար ԱՄՆ դոլար է հավաքագրվել, որով իրենք տեղում սնունդ եւ հագուստ կգնեն փախստական եզդիների համար:
«Հավաքված գումարն անձամբ մենք ենք տանում, որ մարդկանց հաշվետու լինենք, թե ինչի վրա է ծախսվել այդ գումարը: Տեղում ենք գնումներն անելու, իրենց անհրաժեշտ պարագաներ ենք տրամադրելու: Թուրքիայում ընկերներ ունենք, որոնք մեզ դիմավորելու են, ճանապարհների հարցում օգնելու են»,-ասաց Բորիս Մուրազին:
Նշենք, որ Իրաքում տեղի ունեցող իրադարձություններով պայմանավորված` հազարավոր եզդիներ փախուստի են դիմել, նրանց որոշ մասը սպանվել է, կամ փախուստի ճանապարհին մահացել: Փախստական եզդիների մի զգալի մաս ապաստանել է լեռներում, նրանք սննդից, ջրից, բուժօգնությունից զուրկ են եւ օգնություն են խնդրում: