Ի սկզբանե «Ժառանգություն» խորհրդարական խմբակցությունը հայտարարել էր, որ կառավարության նոր կազմը ոչ մի լավ բան չի խոստանում, քանի որ չունի նպատակային քաղաքական ծրագիր եւ հույսը դնում է իր «ճարպկության» վրա: Այդ մասին այսօր՝ օգոստոսի 26-ին, մամուլի ասուլիսի ժամանակ հայտարարեց «Ժառանգություն» խորհրդարանական խմբակցության ղեկավար Ռուբեն Հակոբյանը:
Հակոբյանի խոսքով՝ կառավարությունը կառուցողական փոփոխություններ եւ երկրում բարեփոխումներ իրականացնելու ոչ մի հստակ ծրագիր չունի: «Բնական է, որ նման պայմաններում կառավարությունը հաջողությունների չի հասնի: Բացի կոսմետիկ PR քայլերից, կառավարության կողմից երկրի իրավիճակի բարելավման ուղղությամբ ոչ մի իրական քայլ չի ձեռնարկվել, լինի դա սոցիալ-տնտեսական, թե բարոյական մթնոլորտում»:
Այդ առիթով, Հակոբյանը հայտարարեց, որ կառավարությանը ներկայացված 12 պահանջների մասով խորհրդարանական քառյակի դիրոքորոշումը չի փոխվել:
Ի պատասխան հարցին՝ կանխատեսո՞ւմ է արդյոք Հակոբյանը «թեժ» քաղաքական աշուն, վերջինս խորհուրդ տվեց խուսափել մակդիրներից, քանի որ դրանք շատ հարաբերական գնահատականներ են: «Այսօր իշխանության իրական այլընտրանքը խորհրդարանական քառյակն է, որը կարող է լուծել իր առջեւ դրված առաջադրանքները՝ ժողովրդի անմիջական աջակցությամբ: Խորհրդարանական քառյակը այն քաղաքական միավորումն է, որը կարող է առանց ցնցումների, առանց մայդանների երկրում կառուցողական փոփոխությունների հասնել»:
