Հայաստանն առաջին անգամ սկսել է Վրաստան ցեղական անասուններ արտահանել: Այս մասին NEWS.am-ի թղթակցի հետ զրույցում հայտարարեց Հայաստանի գյուղնախարարության անասնաբուծության եւ անասնաբուժության վարչության պետ Աշոտ Հովհաննիսյանը: Այս տարի ծրագրվում է եվոպական ցեղատեսակի 200 գլուխ կով արտահանել:
«Սրանք այն կովերն են, որ մենք Եվրոպայից ենք ներկրում պետական ծրագրի շրջանակում եւ իրացնում ենք ֆերմերային տնտեսությունների ագրարային ընկերությունների շրջանում, որոնք բուծում են անասունների հետագա սերունդներին: Եվ ահա մեր երեք ագրոընկերություններ սկսել են այստեղ աճեցված հորթեր վաճառել վրացի ֆերմերներին»,- նշեց Հովհաննիսյանը:
Նա նաեւ հավելեց, որ Վրաստանը նույնպես ցեղական կովերի ներկրման ծրագիր էր իրականացնում, սակայն չի հաջողվել դրանց հարմարեցնել կլիմային: «Իսկ մեր կլիմայական պայմանները մոտ են, ուստի եթե մեզ մոտ հարմարվել են, այնտեղ նույնպես պետք է հարմարվեն: Վրացի ֆերմերները սա հաշվի են առել, ուստի պատրաստվում են պարբերաբար անասուններ գնել»,- նշեց Հովհաննիսյանը:
Ըստ նրա, Հայաստանը ցեղական անասուններ չի արտահանել նույնիսկ խորհրդային տարիներին՝ չհաշված եզակի դեպքերը: «Այնպես որ՝ մեր ծրագիրը, որը մի քանի տարի առաջ է սկսվել, դարձյալ ապացուցեց, որ ճիշտ մտածված ու պահանջված էր»,- եզրափակեց Աշոտ Հովհաննիսյանը: