Մոսկվայի Շերեմետեւո օդանավակայանում դեբոշ կազմակերպելու մեղադրանքով ձերբակալվել է Դուբայ-Մոսկվա չվերթի ուղեւորը, փոխանցում է ԻՏԱՌ-ՏԱՍՍ-ը՝ վկայակոչելով Կենտրոնական դաշնային շրջանի տրանսպորտի ոստիկանության վարչությանը:
«Այսօր՝ 05.00-ին, Շերեմետեւո օդանավակայանի ոստիկանությունը լուր էր ստացել Դուբայ-Մոսկվա չվերթի ուղեւորի մասին, որը թռիչքի ժամանակ իրեն ոչ ադեկվատ է պահում եւ խանգարում ուղեւորներին: Օդանավը պետք է վայրէջք կատարեր Շերեմետեւոյի օդանավակայանում 07.25-ին, սակայն վայրէջք է կատարել միայն 10.52-ին՝ չվերթի ձգձգվելու պատճառով: Ոստիկանությունը ուղեւորից ցուցմունքներ է վերցնում», - պատմել են ոստիկանները:
Ձերբակալվածն Ադրբեջանի քաղաքացի է:
Հաղորդվել է, որ օդանավը Մոսկվա ճանապարհին հարկադիր վայրէջք է կատարել Երեւանի օդանավակայանում, սակայն հայկական ոստիկանությունը հրաժարվել է ընդունել խուլիգանին: Տղամարդուն ձեռնաշղթաներ են հագցրել, հանգստացնող ներարկում կատարել եւ ուղարկել Ռուսաստան:
