Թուրքիայի նախագահ Աբդուրլլահ Գյուլը նախագահի պաշտոնից հեռանալու իր հրաժեշտի ուղերձում հիշտակել է Լեռնային Ղարաբաղի հակամարտության մասին: Նրա ուղերձը հեռարձակվել է օգոստոսի 25-ի երեկոյան թուրքական հեռուստաընկերություններով:
«Լեռնային Ղարաբաղի եւ Պաղեստինի խնդիրները իմ նախագահության տարիներին մշտապես եղել են մեր ուշադրության կենտրոնում, մենք փորձել ենք հանդես գալ այս խնդիրներին լուծմանն ուղղված մոտեցումներով: Ես նաեւ կազմակերպել եմ տարածաշրջանային համագործակցության մի շարք նախաձեռնություններ եւ մեխանիզմներ», - հայտարարել է Գյուլը:
Նա հատուկ ընդգծել է, որ ինքը պետության առաջին ղեկավարն էր, ով լուրջ ուշադրություն դարձրեց կրոնական փոքրամասնությունների խնդիրերին:
«Իմ համոզմամբ, մենք պարտավոր ենք հանդուրժել Թուրքիայի ցանկացած քաղաքացու: Տարբեր կրոնական հավատամքները, տեսակետները, ինքնագիտակցության բազմազանությունը մեր հարստությունն են, կարող եմ ասել անգամ մեր ուժը: Հարգանքը մարդու հիմնարար, այդ թվում կրոնական ազատությունների հանդեպ իմ քաղաքական համոզմունքների անբաժան մասն է», - ասել է Գյուլը` ընդգծելով նաեւ, որ իր նախագահության 7 տարիների ընթացքում աջակցել է քրդական փոքրամասնության իրավունքների ընդլայնմանն ուղղված ջանքերին, ինչպես նաեւ մեծ ուշադրություն է դարձրել Թուրքիայի բնակչության մահեմդականություն չդավանող խմբերի պրոբլեմներին:
Իր հրաժեշտի ուղերձում Գյուլը նա նշում է, որ արտաքին քաղաքական ասպարեզում իր յոթնամյա գործունեության հիմնական ուղղություւններից մեկը եղել է Եվրամիության հետ հարաբերությունների խորացումը:
«Ես շարունակում եմ հավատարիմ մնալ այն համոզմանը, որ Թուրքիան պետք է դառնա Եվրամիության լիիրավ անդամ: Դա կլինի մի քայլ, որից մեծապես կշահեն թե' Թուրքիան` որպես ժողովրդավարական ու իսլամական պետություն եւ թե' ողջ իսլամական աշխարհը», -ընդգծել է Թուրքիայի նախագահը:
Նա նաեւ հիշեցրել է «թյուրքական աշխարհի, ինչպես նաեւ Ասիայի զարգացող երկրների հետ հարաբերությունների զարգացման հարցում մասին»: