Սեպտեմբերին նախանշված ՆԱՏՕ-ի գագաթաժողովում քննարկվելու է Արեւելյան Եվրոպայում դաշինքի նոր բազաների տեղակայման հարցը: Այս մասին բրիտանական Guardian-ին տված հարցազրույցում հայտարարել է դաշինքի գլխավոր քարտուղար Անդերս Ֆոգ Ռասմուսենը:
Բլոկի անդամ պետությունները փորձելու են հաղթահարել ՆԱՏՕ-ի ներսում գոյություն ունեցող տարաձայնությունները եւ Արեւելյան Եվրոպայում նոր բազաների տեղակայման մասին որոշում ընդունել: «Առանցքայինն այն է, որ ապագայում արեւելքում ՆԱՏՕ-ի ավելի տեսանելի ներկայություն կզգաք»,- ասել է նա:
«Մենք արդեն ՆԱՏՕ-ի օպերատիվ ուժեր ունենք, որոնց նպատակն է՝ անհրաժեշտության դեպքում պատրաստ լինել արագ արձագանքմանը: Հիմա մտադիր ենք այդ օպերացիոն ուժերի ներսում առաջնային ուժերը զարգացնել եւ հասցնել մարտական պատրաստականության շատ-շատ բարձր մակարդակի»,- նշել է դաշինքի գլխավոր քարտուղարը:
Ըստ «Ինտերֆաքս»-ի, Ռասմուսենն ընդգծել է, որ ՆԱՏՕ-ն ծրագրում է քայլեր ձեռնարկել՝ Ուկրաինայի անվտանգության ամրապնդման, այդ երկրի զինված ուժերի արդիականացման ուղղությամբ, ինչպես նաեւ մտադիր է աջակցել Կիեւին Ռուսաստանի կողմից սպառնալիքին դիմակայելու հարցում:
Հավելենք, որ դաշինքի գագաթաժողովն անցկացվելու է սեպտեմբերի 4-5-ը, Ուելսում: