ԵՄ-ն առաջարկել է Ուկրաինայի եւ Ռուսաստանի միջեւ «գազի միջանկյալ համաձայնություն ձեռք բերել»՝ չսպասելով Սթոքհոլմի արբտրաժային դատարանի որոշմանը։ Այս մասին Ուկրաինայի նախագահ Պյոտր Պորոշենկոյի հետ հանդիպման արդյունքում հայտարարել է էներգետիկայի հարցերով եվրահանձնակատար Գյունտեր Էթինգերը։
«Սթոքհոլմի դատարանում երկու գործ է քննվում ( «Գազպրոմի» եւ «Նավթոգազի» միմյանց դեմ հայցերը), բայց լսումները 12-15 ամիս կտեւեն, եւ մենք այդքան երկար չենք կարող սպասել։ Մեզ միջանկյալ լուծում է պետք այս ձմռանը», - ասել է Էթինգերը, փոխանցում է ԻՏԱՌ-ՏԱՍՍ-ը։
«Գազպրոմը» Սթոքհոլմի արբտրաժային դատարան էր դիմել «Նավթոգազ Ուկրաինայից» 4,5 մլրդ դոլար գանձելու հայցով՝ 2009թ. հունվարի 19-ին կնքված 2009-2019թթ. գազի առուվաճառքի պայմանագրի պարտավորությունների կատարման հետ կապված», - ասված էր ընկերության հաղորդագրությունում։
Իր հերթին՝ «Նավթոգազ» ազգային բաժնետիրական ընկերությունը Սթոքհոլմի արբիտրաժային դատարան հայց էր ներկայացրել ռուսական «Գազպրոմի» դեմ՝ գազային պայմանագիրը վերանայելու վերաբերյալ։
«Ընկերությունը պահանջում է արդար եւ շուկայական գին սահմանել «Գազպրոմի»՝ Ուկրաինա մատակարարվող գազի համար», - ընդգծում է Ուկրաինայի ընկերությունը։
Բացի դրանից, հայցում պահանջվում է նաեւ «Գազպրոմ» ԲԲԸ-ին տուգանել գազի գերավճարի համար, որը ռուսական մոնոպոլիստը մատակարարել է «Նավթոգազին»՝ 2010 թ.»։ Ըստ «Նավթոգազի» գնահատման՝ գերավճարը կազմում է 6 միլիարդ դոլար։