Հայաստանի քաղաքացու գերեվարման մասին նախօրեին ադրբեջանական մամուլի տարածած տեղեկությունները առայժմ հաստատում չեն գտել:
Հիշեցնենք, «սենսացիոն» հաղորդագրությունը հրապարակել էր ադրբեջանական «Ենի Մուսավաթ» թերթը: Ըստ այդ աղբյուրի՝ օգոստոսի 26 –ին Ղազախի շրջանի Քեմերլի գյուղում իբր 50-55 տարեկան տղամարդու էին ձերբակալել: Որոշ ժամանակ անց տղամարդուն տարել էին զինվորականները: Թերթը այլ մանրամասներ չէր հաղորդել ձերբակալվածի բնակության վայրի մասին:
Պարզվեց՝ ադրբեջանական թերթերը շտապել են «դիվերսանտ» բռնելու մասին հայտարարություն անելով: Մի քանի ժամիս «դիվերսանտը» այդ նույն թերթերում դարձավ «աղքատությունից փախած» ՀՀ բնակիչ:
Նման «կերպարանափոխման» փաստ հենց շատ բանի մասին է վկայում:
«Դիվերսիայի» մասով տեղեկատվությունը հերքեց ՀՀ պաշտպանության նախարարի մամուլի քարտուղար Արծրուն Հովհաննիսյանը:
«Ադրբեջանական կողմի տարածած հաղորդագրությունն ապատեղեկատվություն է», - ասել էր նա:
Սահմանամերձ գյուղերում քաղաքացիական բնակչության շրջանում ստուգումներ են կատարվել, պարզվել է՝ բացակա անձինք չկան: ԿԽՄԿ-ի երեւանյան գրասենյակից NEWS.am-ի թղթակցին հայտնեցին, որ ՀՀ քաղաքացու ձերբակալման վերաբերյալ Բաքվի պատվիրակությունից որեւէ տեղեկություն չեն ստացել:
Այսպիսով, ադրբեջանական մամուլի տեղեկությունը հաստատում չգտավ:
Մեծ է հավանականությունը, որ ադրբեջանական քարոզչամեքենան պարզապես հորինել է «դիվերսանտ-փախստականի» կերպարը, որը Հայաստանի ցածր կենսամակարդակի պատճառով փախել է Ադրբեջան:
Այս է վկայում «դիվերսանտի» կերպարանափոխությունը «թշվառ փախստականի», որի հետ նաեւ ցանկացել էին փախչել համագյուղացիները, բայց փոշմանել են: Ընդ որում՝ թե որ գյուղի բնակչի մասին է խոսքը, չի հաղորդվում:
«Եթե Ադրբեջանն անվտանգության երաշխիքներ տա, Հայաստանից փախստականների մի ամբողջ հոսք կսկսվի», - հայի խոսքն են մեջբերել տեղի բնակիչները:
Ապատեղեկատվությունը, ակնհայտաբար, Ադրբեջանի իմիջը վերականգնելու նպատակ է հետապնդում: Չէ՞ որ մեկ ամիս էլ չի անցել այն դեպքից, երբ ադրբեջանական գերության մեջ սպանվել էր հերթական հայ գերին՝ Կարեն Պետրոսյանը: Եվ նման հանցագործությունների դեպքերն, ավաղ, քիչ չեն: