«Միկա» մարզադաշտն աճուրդի է հանվել ՊԵԿ Կենտրոնի հարկային տեսչության պահանջով: Այս մասին NEWS.am-ին ասաց արդարադատության նախարարության դատական ակտերի հարկադիր կատարումն ապահովող ծառայությունից:
««Միկա» մարզական կոմպլեքսի գույքի հարկադիր էլեկտրոնային աճուրդով իրացնելու մասին որոշումը կայացվել է ՀՀ վարչական դատարանի թիվ ՎԴ/2690/05/13 կատարողական թերթի հիման վրա հարուցված կատարողական վարույթով, որի ընթացքում օրենքով սահմանված կարգով կատարվել է պարտապանին իրավահաջորդով փոխարինում, այն է՝ «Արմավիա-Ավիաընկերություն» ՍՊ ընկերությունը փոխարինել «Միկա Քորփորեյշն» ՓԲ ընկերությունով: Բռնագանձման ենթակա գումարը կազմում է 7.176.417.966 ՀՀ դրամ, իսկ պահանջատեր է հանդիսացել ՀՀ ԿԱ ՊԵԿ Կենտրոնի հարկային տեսչությունը»,- ասաց ծառայության մամուլի պատասխանատու Ռիմա Եգանյանը:
Նշենք, որ մարզադաշտն աճուրդի է հանվել օգոստոսի 25-ին, մեկնարկային գինը կազմում է 9 մլրդ դրամ: Աճուրդի վերջնաժամկետը սեպտեմբերի 4-ն է:
