Բրիտանիայի վարչապետ Դեյվիդ Քեմերոնը եւ ԵԽ նախագահ Հերման վան Ռոմպեյը հայտարարել են ԵՄ-ի կողմից Ռուսաստանի վրա ճնշում գործադրելու անհրաժեշտության մասին` Ուկրաինայի արեւելքի իրադրության հետ կապված:
Բրիտանիայի կառավարության կայքում հրապարակված հայտարարության մեջ ասվում է, որ երկու քաղաքական գործիչներն էլ «համաձայնել են, որ ԵՄ-ն պետք է շարունակի ճնշում գործադրել նախագահ Վլադիմիր Պուտինի վրա` իրավիճակի լարվածությունը թոթափելու համար»:
Քեմերոնն Ուկրաինայի իրավիճակը քննարկել է նաեւ Գերմանիայի կանցլեր Անգելա Մերկելի հետ:
«Երկու առաջնորդն էլ համաձայնել են, որ ճգնաժամի ռազմական լուծում չի կարող լինել, եւ որ նախագահ Պուտինը պետք է լիարժեք բանակցություններ սկսի` քաղաքական լուծում գտնելու համար», - ասվում է հայտարարությունում, փոխանցում է BBC-ի ռուսական ծառայությունը:
Ավելի վաղ Անգելա Մերկելը Վլադիմիր Պուտինի հետ հեռախոսազրույցում հայտարարել էր, որ անհրաժեշտ է պարզաբանել Ուկրաինայի տարածքում հայտնվող ռուսական զորքերի վերաբերյալ լուրերը: