Ռուսաստանը ողջունում է ղարաբաղյան հակամարտության կարգավորմանն ուղղված ցանկացած հանդիպում: Այս մասին օգոստոսի 28-ին լրագրողների հետ զրույցում հայտարարել է Հայաստանում ՌԴ արտակարգ եւ լիազոր դեսպան Իվան Վոլինկինը՝ պատասխանելով NEWS.am-ի թղթակցի՝ հոկտեմբերին Ֆրանսիայի նախաձեռնությամբ Հայաստանի եւ Ադրբեջանի նախագահների Փարիզում սպասվող հանդիպման մասին հարցին:
Ի պատասխան հարցին՝ ռուսական կողմն արդյոք հետեւողական կլինի ադրբեջանական գերության մեջ Կարեն Պետրոսյանի սպանության գործի հետաքննության հարցում՝ դիվանագետն ընդգծեց, որ դա միայն ռուսական կողմից չէ կախված: Հետաքննությունը պետք է բազմակողմանի հիմքով տարվի՝ բոլոր կողմերի ներգրավվածությամբ: Ամեն ինչ կախված կլինի հետաքննության հարցում կողմերի պայմանավորվածություններից: Բանն այն է, որ միջադեպերի հնարավոր ռիսկերը նվազեցնելու համար հարկավոր է, որպեսզի հետաքննությունների մեխանիզմը լավ աշխատի»,- նշեց Իվան Վոլինկինը:
Հիշեցնենք, ՌԴ ԱԳՆ-ի պաշտոնական ներկայացուցիչ Ալեքսանդր Լուկաշեւիչը, պատասխանելով Կարեն Պետրոսյանի սպանության հարցում ՌԴ դիրքորոշման մասին հարցին, հաշվի առնելով որ համանախագահ մյուս երկրներ ԱՄՆ-ն եւ Ֆրանսիան վերջերս այդ հարցի վերաբերյալ հայտարարությամբ էին հանդես եկել, ասել էր. «Մեր խորին ցավակցությունն ենք հայտնում Կարեն Պետրոսյանի, ինչպես նաեւ կյանքից զրկված մյուս հայերի ու ադրբեջանցիների հարազատներին: Նման տիպի բոլոր միջադեպերի մանրակրկիտ հետաքննության անցկացումը անհրաժեշտություն է»:
Տավուշի մարզի Չինարի գյուղի բնակիչ, 32-ամյա Կարեն Պետրոսյանը գերի էր ընկել օգոստոսի 7-ին, իսկ մեկ օր անց էլ ադրբեջանական կողմը տեղեկատվություն էր տարածել, որ հայ երիտասարդը «հանկարծակի» մահացել է «սրտանոթային սուր անբավարարությունից»: