Բացառապես կանանցով բնակեցված Բրազիլական Նոյիվա դու Կորդեյրու քաղաքի բնակչուհիները դիմել են Երկրագնդի տղամարդկային հատվածին՝ առաջարկելով մշտական բնակության տեղափոխվել իրենց մոտ, հայտնում է lenta.ru-ն՝ վկայակոչելով The Daily Star-ը:
Քաղաքում 600-ից ավելի կին է բնակվում՝ 20-35 տարեկան: Նրանք ռոմանտիկ հարաբերություններ սկսելու եւ ամուսնանալու ցանկություն են հայտնել: Այս մասին կանայք ապագա փեսացուներին իրազեկել են մամուլով եւ քաղաքի Facebook-յան էջով՝ Կորդեյրուի առօրյայից նկարներ հրապարակելով:
Նրանք ընդգծել են, որ հետաքրքրված են բացառապես ամուրիներով, որոնք պատրաստ են ընդունել իրենց կյանքի դրվածքը, փաստացի՝ մայրիշխանությունը: Բրազիլուհիները սովորել են ինքնուրույն ղեկավարել քաղաք-համայնքը՝ ֆերմերային մեծ տնտեսությամբ հանդերձ:
Նոյիվա դու Կորդեյրու քաղաքի բնակչուհիների մի մասն ամուսնացած է եւ ունի երեխաներ, սակայն նրանց ամուսիններն ու զավակները այլ քաղաքներում են ապրում ու աշխատում: Եվ ընդամենը տղամարդկանց մի մասին է թույլատրվում տուն գալ հանգստյան օրերին:
Համայնքի չամուսնացած աղջիկները ամուսնացածների որդիների հետ չեն կարող ամուսնանալ, քանի որ շատ ընտանիքներ արդեն վաղուց հարազատացել են եւ նրանց սերունդները զարմիկ-զարմուհիներ են հիմնականում:
Նոյիվա դու Կորդեյրու քաղաքի երիտասարդ բնակչուհիները պատմել են, որ իրենցից շատերը արդեն մի քանի տարի է չեն համբուրվել: Նրանք ասել են, որ երազում են սիրահարվել եւ ամուսնանալ:
