ԵԱՀԿ Մինսկի խմբի միջնորդները կողմերին առաջարկում են ղարաբաղյան հակամարտության գոտում` շփման գծին, միջադեպերի հետաքննման մեխանիզմներ ստեղծել, իսկ Ադրբեջանը պարբերաբար մերժում է այդ առաջարկները, NEWS.am-ին ասաց ԼՂՀ ԱԺ պատգամավոր Վահրամ Աթանեսյանը՝ հավելելով, որ հրադադարի ռեժիմը խախտելու քաղաքականությունը Ադրբեջանի պետական քաղաքականության մասն է:
Անդրադառնալով Հայաստանում Ռուսաստանի արտակարգ եւ լիազոր դեսպան Իվան Վոլինկինի ` միջադեպերի հնարավոր վտանգը նվազեցնելու նպատակով հետաքննության մեխանիզմներ ստեղծելու անհրաժեշտության մասին հայտարարությանը, պատգամավորն ընդգծել է, որ ԼՂՀ-ն միշտ էլ կողմ է եղել շփման գծում միջադեպերի հետաքննության մեխանիզմներ ձեւավորելուն: Ըստ Վահրամ Աթանեսյանի` դա բխում է ԼՂՀ-ի շահերից: «Ռուսաստանի դեսպանի հայտարարությունն այս տեսանկյունից պետք է միայն ողջունել եւ հուսալ, որ ԵԱՀԿ Մինսկի խմբի համանախագահները կարող են այնպիսի մեխանիզմներ գտնել, որոնք թույլ կտան ճիշտ կողմնորոշվել հրադադարի ռեժիմը խախտելու ցանկացած միջադեպի պարագայում, եւ ինչու չէ, պատասխանատվության ենթարկել խախտող կողմին, որը գերազանցապես Ադրբեջանն է», - նշել է Վահրամ Աթանեսյանը:
Պատգամավորը հիշեցրել է, որ Հայաստանն ու ԼՂՀ-ն միշտ էլ կողմ են եղել միջադեպերի հետաքննման մեխանիզմներ ձեւավորելուն: «Հայկական կողմն արդեն մի քանի տարի է նաեւ առաջարկում է դիպուկահարներին հեռացնել շփման գծից, իսկ Ադրբեջանը չի ընդունում այս առաջարկը», - հավելել է Վահրամ Աթանեսյանը:
