Ժամկետային զինծառայող Լյուքս Ստեփանյանի սպանության համար 17 տարվա ազատազրկման դատապարտված Դավիթ Խաչատրյանին կվիրահատեն սեպտեմբերի 1-ին: Այս մասին NEWS.am-ին ասաց ՀՀ արդարադատության նախարարության քրեակատարողական վարչության հանրային կապերի բաժնի պետ Գոռ Ղլեչյանը։
«Դավիթ Խաչատրյանի վիճակը բավարար է, գտնվում է բժիշկների վերահսկողության տակ, սեպեմբերի 1-ին, ամենաուշը՝ 2-ին կվիրահատեն»,-ասաց նա:
Դավիթ Խաչատրյանի եղբայրը՝ Վարդան Խաչատրյանն էլ NEWS.am-ի հետ զրույցում նշեց , որ իրենք տեսակցել են Դավիթին. «Մի քանի օր է, ինչ Դավիթին տեղափոխել են դատապարտյալների հիվանդանոց, ցավեր ունի, ուռած է, նեղվում է էդ ցավերից»:
Նշենք, որ Դավիթ Խաչատրյանի մոտ ախտորոշվել է ողնաշարի կիստա, նաեւ սրտի աշխատանքի անբավարարություն:
Ավելի վաղ NEWS.am-ը հաղորդել էր, որ 2013թ. մայիսի 15-ին, ժամը 15:30-ի սահմաններում, ՀՀ ՊՆ N զորամասի պահակախմբի մուտքի դիտորդ, ժամկետային զինծառայող, շարքային, 19-ամյա Դավիթ Ռաֆայելի Խաչատրյանն իրեն ամրակցված ԱԿՄ տեսակի ինքնաձիգից կրակոց էր արձակել, ինչի հետեւանքով պահակախմբում ընդգրկված ժամկետային զինծառայող, շարքային Լյուքս Ստեփանյանը գլխի շրջանում ստացած հրազենային վիրավորումից տեղում մահացել էր, իսկ նույն զորամասի ժամկետային զինծառայող, շարքային Հրաչյա Վաղինակի Սարգսյանը գլխի շրջանում ստացել էր հրազենային վիրավորում: Դավիթ Խաչատրյանը դատապարտվել է 17 տարվա ազատազրկման։ Դավիթը ամբողջ դատավարության ընթացքում պնդել է, որ պատահաբար է կրակել։