Ինչպես ՀՀ ԱԳՆ-ի ներկայացուցիչները, այնպես էլ հայ փորձագետները առաջին հերթին պետք է խոսեն այն նպատակների մասին, որոնց հայկական կողմը ձգտում էր հասնել Թուրքիայի նախագահ Էրդողանի երդմնակալությանը արտգործնախարարի մակարդակով մասնակցությամբ, օգոստոսի 29-ին մամուլի ասուլիսում հայտարարել է Միջազգային եւ անվտանգության հարցերի հայկական ինստիտուտի ղեկավար, քաղաքական վերլուծաբան Ստեփան Սաֆարյանը:
Ըստ նրա՝պաշտոնական Երեւանը նույնիսկ չի կարողանում բացատրել, թե ինչի է ուզում հասնել այդ այցի օգնությամբ: «Անհրաժեշտ է քննարկել այն մթնոլորտը, որի պայմաններում Երեւանը կարող է հասնել նշված այցի առաջադրած նպատակներին: Սակայն, մեծ ակնկալիքներ չպետք է կապել Թուրքիայի նախագահի երդմնակալության արարողությանը հայկական կողմի ներկայության հետ», - ընդգծել է Ստեփան Սաֆարյանը:
Անդրադառնալով Էրդողանին հասցեագրված եւ արտգործնախարար Էդվարդ Նալբանդյանի միջոցով հանձնված ՀՀ նախագահ Սերժ Սարգսյանի ուղերջին՝ վերլուծաբանը նշել է, որ նույնիսկ եթե այդ նամակ-հրավերը չլիներ, բոլորին էլ հասկանալի էր, որ թեկուզ բանավոր արտգործնախարարը կհաստատի 2015թ. Հայաստան այցելելու Սերժ Սարգսյանի հրավերը Թուրքիայի նոր նախագահին: «Պաշտոնական Երեւանը սա անում է՝ հաշվի առնելով Թուրքիայի շուրջ ծավալվող գործընթացները. Երեւանը փորձում է միանալ Արեւմուտքի եւ Թուրքիայի հարաբերությունների հետ կապված մարտավարությանը», - հավելել է Ստեփան Սաֆարյանը:
Հիշեցնենք, որ օգոստոսի 28-ին կայացել է Թուրքիայի ընտրված նախագահ Ռեջեփ Թայիփ Էրդողանի երդմնակալության պաշտոնական արարողությունը: Միջոցառմանը ներկա է եղել ՀՀ արտգործնախարար Էդվարդ Նալբանդյանը: