Տեղեկությունն այն մասին, որ վրացական «Anaklia IEP Holding» ընկերությունը 600 մլն դոլար է ներդնում Հայաստանի տնտեսության մեջ՝ գազի էլեկտրակայանի շինարարության համար, Վրաստանում անհանգստություն է առաջացրել: Այս մասին գրում է վրացական «Georgia Today» թերթը:
«Նորությունը ցնցող էր: Տագնապ է առաջացնում այն, որ Վրաստանը, որի բյուջեն մեծ մասամբ կախված է օտարերկրյա ներդրումներից, ֆինանսական նման մեծ հոսք է կատարում հարեւան երկրի տնտեսության մեջ՝ սեփական տնտեսության մեջ ներդնելու փոխարեն»,- նշում է պարբերականը:
Հոլդինգի բաժնետոմսերի 100 տոկոսի սեփականատեր Թեյմուրազ Կարչավան լրագրողներին պատմել է նախագծի մանրամասների մասին: Սկզբում գազի էլեկտրակայանի շինարարությունը նախատեսվում էր Անգլիայում. 400 մլն դոլար արժողությամբ սարքավորումներն արդեն ձեռք էին բերվել «General Electric» ընկերությունում: Սակայն Անգլիայում բնական գազի բարձր գինը խափանեց ծրագիրը: Ուստի ընտրվեց Հայաստանը. Հայաստանի կառավարությունը երաշխավորում է տարեկան 1 մլրդ խորանարդ մետր գազի տրամադրում առավել ցածր գնով:
«Կարչավայի հավակնոտ ծրագրերն առաջին հայացքից հետաքրքիր են թվում: Սակայն նման մեծ ներդրումները հարեւան երկրում բազում հարցեր են առաջացնում՝ չխոսելով արդեն Կարչավայի բրիտանական արկածախնդրության մասին»,- գրում է «Georgia Today»-ը:
Հիշեցնենք, որ օգոստոսի 22-ին Հայաստանի էներգետիկայի եւ բնական ռեսուրսների նախարարությունում Հայաստանի կառավարության եւ «Anaklia IEP Holding» ՍՊԸ-ի միջեւ կնքվեցին երկրի տարածքում 540 ՄՎտ հզորությամբ էլեկտրակայանի շինարարության եւ շահագործման մասին համաձայնագրի հիմնական դրույթները: «Anaklia IEP Holding» ընկերությունը նախագծի իրականացման համար ներդնում է 600 մլն դոլար: