Բաքվում ուշադիր հետեւեւմ եւ չեն անհանգստանում Եվրասիական տնտեսական միությանը Հայաստանի անդամակցության համար, քանի որ դրանից հետո Հայաստանն ավելի անօգնական դրության մեջ կհայտնվի, օգոստոսի 29-ին մամուլի ասուլիսում հայտարարել է Միջազգային եւ անվտանգության հարցերի հայկական ինստիտուտի ղեկավար, քաղաքական վերլուծաբան Ստեփան Սաֆարյանը:
Նրա համոզմամբ՝ Հայաստանի անդամակցությունը ԵՏՄ-ին Ադրբեջանի համար եւս մեկ խոչընդոտ կլինի Լեռնային Ղարաբաղում ռազմական արկածախնդրության ճանապարհին: «Իհարկե, Ղազախստանը հազիվ թե պաշտպանի Հայաստանին, սակայն ձեւականորեն եւս մեկ ձեւաչափով Ղազախստանը կդառնա Հայաստանի դաշնակիցը», - նշել է Ստեփան Սաֆարյանը: Նա ընդգծել է, որ ՄՄ անդամ երկրների «եռյակի» բոլոր նիստերին քննարկվել է Հայաստանի անդամակցության հարցը: «Ակնհայտ է, որ օգոստոսի 26-ին Մինսկում քննարկվել է ԵՏՄ-ին Հայաստանի անդամակցության հարցը: Սակայն ես կարծում եմ, որ համաձայնության չեն հասել. Այն, որ միայն Ղազախստանի նախագահ Նուրսուլթան Նազարբաեւն է խոսել Հայաստանի հնարավոր անդամակցության մասին, եւ այն էլ՝ զգույշ ձեւակերպումներով, նշանակում է, որ Հայաստանի անդամակցության հարցերը սպառիչ պատասխաններ չեն ստացել, եւ փաստ չէ, որ հոկտեմբերին 10-ին Հայաստանը կդառնա ԵՏՄ անդամ», - հայտնել է Ստեփան Սաֆարյանը:
Նշենք, որ Եվրասիական տնտեսական միությանը Հայաստանի անդամակցության մասին փաստաթղթի ստորագրումը նախատեսվում է այս տարվա հոկտեմբերին: