Ամերիկյան Ֆլորիդա նահանգի հանրային հեռուստատեսությունում աշխատող գրող, ռեժիսոր եւ պրոդյուսեր Բարեդ Մարոնյանը «1915 թվականի կանայք» վերնագրով փաստագրական ֆիլմ է պատրաստում: Այս մասին գրում է «The Armenian Mirror-Spectator»-ը:
Երկար տարիներ Բարեդ Մարոնյանն իր տաղանդներն օգտագործել է զանգվածային տարբեր լրատվամիջոցներում: 21 տարի աշխատելով «PBS»-ում՝ նա 4 տարածաշրջանային «Էմմի»-ի է արժանացել: Բայց հետո որոշել է իր հմտություններն օգտագործել հայերի ցեղասպանության թեմայով փաստագրական ֆիլմերի ստեղծման համար:
«Ցեղասպանության որբեր» նախագծի շուրջ աշխատանքից հետո պրոդյուսերը որոշել է կենտրոնանալ Հայոց ցեղասպանության զոհ դարձած, ինչպես նաեւ ամերիկացի ու եվրոպացի կանանց ճակատագրի ուղղությամբ, ովքեր օգնել են ցեղասպանության զոհերին:
Մարոնյանի խոսքով՝ ֆիլմը կներկայացնի հայ կանանց ծանր ճակատագիրը, ինչպես նաեւ ոչ հայ կանանց, ովքեր օգնել են իրենց քույրերին: «Աղջիկները, որոնք 19, 20, 21 տարեկան են եղել, թողել են իրենց շքեղ տները Սկանդինավիայում, ԱՄՆ-ում կամ Կանադայում եւ որպես կամավոր մեկնել Արեւմտյան Հայաստան եւ հանդիպել իրենց հայ քույրերի հետ»,- նշել է ռեժիսորը:
