Կանադացի գիտնականներին հաջողվել է ապացուցել, որ հնագույն ձկները կարող էին ազատ տեղաշարժվել ցամաքում: Հենց նրանցից են ծագում առաջին ցամաքային կենդանիները:
Կանադացի գիտնականների խումբը պոլիպետրուս ձկների ուսումնասիրության փորձերի ընթացքում ապացուցել է, որ հնագույն ժամանակներում ձկները կարող էին շարժվել ցամաքով, իսկ դրանցից հետագայում ծագել են առաջին ցամաքային կենդանիները: Հետազոտվող խումբը կարողանում է շնչել ոչ միայն ջրում, այլեւ ցամաքում:
Փորձն արտասովոր է եղել. ձկներին բաժանել են երկու խմբի, դրանցից մեկն աճեցվել է ցամաքում, մյուսը՝ ջրում: Ըստ «Vladtime»-ի, որոշ ժամանակ անց «ցամաքային» ձկները տարօրինակ պահվածք են դրսեւորել. նրանք լողակները միմյանց մոտ են դրել եւ սկսել են հենվել դրանց վրա, ինչպես այժմ վարվում են քառոտանիները՝ բարձրացնելով գլուխը, ապա՝ իրանը:
Այս բացահայտումն ապացուցել է գիտնականների նախկին վարկածն այն մասին, որ առաջին ցամաքային կենդանիները ծագել են հնագույն ձկներից, որոնք ազատ տեղաշարժվել են ինչպես ջրում, այնպես էլ ցամաքում:
