Լեռնային Ղարաբաղի Հանրապետության անկախությունը ճանաչելող Կալիֆորնիայի Սենատի որոշումն ամերիկյան արժեքների արտացոլումն է: Այս մասին NEWS.am-ի թղթակցի հետ զրույցում հայտարարեց Հայ Դատի Վաշինգտոնի գրասենյակի գործադիր տնօրեն Արամ Համբարյանը:
Նա ողջունեց ԱՄՆ Կալիֆորնիայի նահանգային Սենատի բանաձեւը՝ ընդգծելով, որ այն Կալիֆորնիայի հայ համայնքի ծավալուն աշխատանքի արդյունք է: «Սակայն կարեւոր է նաեւ այն, որ դա ամերիկյան արժեքների դրսեւորում է: ԱՄՆ-ն այն երկիրն է, որը հիմնված է ժողովրդավարության ու ինքնորոշման գաղափարների վրա: Ամերիկան 1776 թվականին ընտրեց Բրիտանիայից ազատ լինելու ուղին, նույն ուղիով ընթացավ Լեռնային Ղարաբաղը՝ ընտրելով սեփական ուղին»,- ընդգծեց Արամ Համբարյանը:
Նա նաեւ պատմեց, որ Կալիֆորնիայի Սենատի որոշմանը նպաստել է երկարատեւ ծրագիրը, որը մշակվել ու իրականացվել է մի քանի տարվա ընթացքում: «Մենք գործընթացի շուրջ սկսեցինք աշխատել 2 տարի առաջ: Շատ ուրախ ենք, որ բանաձեւն ընդունվել է 23 ձայնով, եւ ոչ ոք դեմ չի արտահայտվել»,- հիացմունքով հայտարարել է Արամ Համբարյանը:
Նշենք, որ Լեռնային Ղարաբաղի անկախությունը, Կալիֆորնիայից բացի, ճանաչել են նաեւ Մասաչուսեթս, Մեն, Ռոդ Այլենդ, Լուիզիանա նահանգները: «Իսկ Մերիլենդ նահանգը շնորհավորել է Լեռնային Ղարաբաղի Անկախության օրվա կապակցությամբ»,- ընդգծեց Արամ Համբարյանը:
Հիշեցնենք, որ ամերիկյան Կալիֆորնիա նահանգի Սենատն օգոստոսի 27-ին ընդունեց Լեռնային Ղարաբաղի Հանրապետության ճանաչման մասին բանաձեւ: Այն նաեւ կոչ է անում ԱՄՆ նախագահին եւ Կոնգրեսին՝ ճանաչել ԼՂՀ անկախությունն ու աջակցել նրան:
