Սովորաբար Ռոբերտ Քոչարյանի ասածները չեմ մեկնաբանում: NEWS.am-ի հետ զրույցում երկրորդ նախագահի քննադատական հարցազրույցներին այսպես արձագանքեց «Նոր ժամանակներ» կուսակցության նախագահ Արամ Կարապետյանը:
«Սովորաբար Քոչարյանի ասածները չեմ մեկնաբանում, բայց ներկայիս տնտեսությունը շատ բնորոշ է նախորդին, օլիգարխիկ է եւ միշտ էլ այդպես է լինելու: Ինչ եղել է 1995թ.-ին, 2000թ.-ին, 2005թ.-ին, շարունակվում է նաեւ այսօր եւ դրա հիմքը դրել է Քոչարյանը: Այսքան ժամանակ որեւէ մեկը չի փորձել փոխել տնտեսության բովանդակությունը եւ կառուցվածքային փիլիսոփայությունը, ոչինչ չեն փոխել, եւ այժմ քննադատում են: Ախր մի մոռացեք նրանց անցած քաղաքական ուղին: Ի՞նչ տնտեսություն, ի՞նչ քաղաքականություն, ի՞նչ հարցերի մասին են խոսում: Մարդիկ են զոհվել, մարդկանց են փողոցում գնդակահարել, մարդկանց են անմեղ սպանել: Ի՞նչ քաղաքական գործչի մասին է խոսքը»,- ասաց նա:
Արամ Կարապետյանի կարծիքով՝ հայ ժողովուրդը ոչինչ չի մոռացել եւ դժվար թե որեւէ մեկը ցանկանա, որ Քոչարյանը նորից քաղաքականություն վերադառնա:
Նշենք, որ հայկական «Նոեւ Կովչեգ» ռուսալեզու թերթին տված հարցազրույցում Քոչարյանը խոսել է քաղաքականություն վերադառնալու, տնտեսության հեռանկարների եւ առհասարակ ինչպես է անցկացնում ազատ ժամանակը:
