Գյումրիի պետական մանկավարժական ինստիտուտի ռեկտորի եղբոր՝ Հարություն Գրիգորյանի սպանության մեջ մեղադրվող Արման Կատունյանը հույս ունի, որ քննության ընթացքում ամեն ինչ կպարզվի: Այս մասին NEWS.am-ին ասաց մեղադրյալի փաստաբան Երվանդ Վարոսյանը:
«Գործը նախաքննության փուլում է, Կատունյանն առաջին օրը ցուցմունք է տվել, որի բովանդակության մասին խոսել չեմ կարող, քանի որ նախաքննական գաղտնիք է: Ամեն դեպքում Կատունյանն իրեն մեղավոր չի ճանաչում կոնկրետ առաջադրված մեղադրանքում, իսկ խափանման միջոց կալանավորումը մենք բողոքարկել ենք Վերաքննիչ քրեական դատարան, դեռ որոշումը չկա»,- ասաց նա:
Հարցին՝ արդյոք Կատունյանի կինն էլ է հարցաքննվել եւ առերեսում կողմերի միջեւ եղել է, թե ոչ, փաստաբանը պատասխանեց. «Առերեսում չի եղել, պատճառ էլ չեմ տեսնում առերեսման, իսկ Կատունյանի կնոջ հարցաքննության մասին տեղեկություններ այս պահին հաղորդել չեմ կարող, քանի որ նախաքննության փուլում է գործը»:
Նշենք, որ Կատունյանը ՊՆ Շիրակի մարզի Ռազմական ոստիկանության քրեական հետախուզության բաժնի պետն էր։ Ըստ Գյումրիում տարածված տեղեկությունների՝ սպանության դրդապատճառը խանդն է։ Կատունյանի խոսքով՝ ռեկտորի եղբայրը երկար ժամանակ սիրահետել է իր կնոջը։ Նրան մեղադրանք է առաջադրվել ՀՀ ՔՕ 104 հոդվածի առաջին եւ 235 հոդվածի առաջին մասերով (ապօրինաբար, դիտավորությամբ մեկ ուրիշին կյանքից զրկելը եւ ապօրինի զենք կրելը): Արման Կատունյանը կալանավորված է եւ գտնվում է «Վարդաշեն» քրեակատարողական հիմնարկում:
Ավելի վաղ NEWS.am-ը հայտնել էր, որ Շիրակի մարզում hուլիսի 24-ին ժամը 16:00-ի սահմանում, Գետք համայնքի չօգտագործվող ֆերմաներից մեկի տարածքում գտել էին Գյումրիի պետական Մանկավարժական ինստիտուտի ռեկտոր Վարդեւան Գրիգորյանի եղբոր՝ Հարություն Գրիգորյանի դին՝ հրազենային տարբեր վնասվածքով։