Armenia Today կայքի համակարգող, վերլուծաբան Արգիշտի Կիվիրյանի դեմ հարուցված քրեական գործով դատական նիստն այսօր՝ օգոստոսի 12-ին, Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում վերածվել է վիճաբանության, քանի որ դատարանն սկսել է գործի տեսանյութերը հետազոտել դատական նիստերի քարտուղարի համակարգչով:
«Դատարանը քարտուղարի համակարգչով սկսեց հետազոտել Կոմիտաս 5-ում դեպքի օրը տեղի ունեցածի վերաբերյալ ոստիկանների ներկայացրած տեսագրությունները: Մի քանի րոպե չհասցրին նայել ու մենք հարց բարձրացրինք, որ անպայման ապահովեն տեխնիկական նորմալ միջոցներ: Էկրանի փոքր լինելու պատճառով տեսանելի չէին մանրուքները, որ կարեւոր են գործի համար: Իրենք նորից շարունակեցին հետազոտել, մենք նորից պահանջ ներկայացրինք, այդ ամենը վերածվեց վիճաբանության»,-NEWS.am-ի հետ զրույցում ասաց Արգիշտի Կիվիրյանի պաշտպան Լուսինե Սահակյանը:
Պաշտպանի խոսքով` դատարանը ձեւական հետազոտում է իրականացնում, որի նպատակը դատական գործընթացն արագացնելն է: «Իրենց պետք չի, որ կարողանան նորմալ հետազոտում իրականացնել, համոզվեն` ինչպիսին է իրականությունը»,- ասաց Լուսինե Սահակյանը` տեղեկացնելով, որ դատական նիստը հետաձգվել է, մյուս նիստին դատարանը պետք է տեխնիկական միջոցներ ապահովի` տեսանյութերը հետազոտելու համար:
Նշենք նաեւ, որ մինչեւ այս հարցաքննվել են նաեւ ոստիկան վկաները, նրանք միմյանց ու իրենց նախաքննական ցուցմունքներին հակասող ցուցմունքներ են տվել: Ոստիկանները, որոնք երեքն էլ ոստիկանական մեքենայում են եղել Կիվիրյանին բերման ենթարկելիս, տարբեր կերպ են ներկայացրել դեպքը: Դատարանն անցել է ապացույցների հետազոտմանը:
Հիշեցնենք, որ նախորդ տարվա օգոստոսի 24-ին Կոմիտաս 5 հասցեում կառուցվող բազմահարկի դեմ հարակից շենքի բնակիչների բողոքի միացած Կիվիրյանը հանցագործության մասին հաղորդում էր տվել, որ բողոքի ակցիայի ժամանակ ոստիկաններն իրեն բաժին տանելիս բռնություն են գործադրել իր նկատմամբ: Սակայն քրգործ հարուցվել էր ոչ թե այդ առթիվ, այլ ոստիկանի հաղորդման հիման վրա, ըստ որի, Արգիշտի Կիվիրյանն է հարվածներ հասցրել ոստիկանին եւ ինքնավնասվել՝ գլուխը հարվածելով ոստիկանական ավտոմեքենայի դռանը: Կիվիրյանի դեմ քրեական գործ է հարուցվել Քրեական օրենսգրքի 316 հոդվածի 1-ին մասով` իշխանության ներկայացուցչի նկատմամբ առողջության համար ոչ վտանգավոր բռնություն գործադրելը:
