Սեդրակ Զատիկյանին սպանելու մեղադրանքով 15 տարվա ազատազրկման դատապարտված ԱԺ նախկին պատգամավոր Հակոբ Հակոբյանի (Լեդի Հակոբի) եղբորորդի Ստեփան Հակոբյանի առողջական վիճակը լավ չէ: Այս մասին NEWS.am-ի թղթակցի հետ զրույցում ասաց ՀՀ ԱՆ ՔԿՀ մամուլի պատասխանատու Գոռ Ղլեչյանը:
Նա նշեց, որ Ստեփան Հակոբյանը մի քանի ամիս է ՝գտնվում է «Դատապարտյալների հիվանդանոցում»՝ բժիշկների հսկողության տակ: Նա մի շարք լուրջ խնդիրներ ունի սրտի, ուղեղի հետ կապված:
Իսկ Ստեփան Հակոբյանի պաշտպան Երեմ Սարգսյանից NEWS.am-ի հետ զրույցում ասաց, որ վճիռը բեկանելու պահանջով դիմել էր Վճռաբեկ դատարան, սակայն այն վարույթ չէր ընդունել: «Ես հակված եմ դիմել Եվրոդատարան, բայց այդ հարցը պետք է քննարկեմ ընտանիքի անդամների հետ, դեռ նվազագույնը 4 ամիս ժամանակ ունենք»,- ասաց փաստաբանը:
Հիշեցնենք, որ Մալաթիայի նախկին թաղապետ, վաղամեռիկ Վահան Զատիկյանի տղան՝ 31-ամյա Սեդրակ Զատիկյանը սպանվել է 2006թ. հունիսի 22-ին` ժամը 14:45-ի սահմաններում, Սեբաստիա եւ Տիչինա փողոցների խաչմերուկում՝ «ԱԿՍ» տեսակի ինքնաձիգից արձակված կրակոցների հետեւանքով, նույն վայրում կրակոցներից մահացել է նաեւ անցորդ, 42-ամյա Կարինե Սարգսյանը: Զատիկյանը մահացել է հիվանդանոցի ճանապարհին: Ստեփան Հակոբյանը մեղադրվում է Նարեկ Խաչատրյանի հետ նախնական համաձայնությամբ Սեդրակ Զատիկյանի սպանությունը Արսեն Առուշանյանին պատվիրելու համար։ Վերաքննիչ դատարանը մերժել է բեկանել Մալաթիա-Սեբաստիա վարչական շրջանների ընդհանուր իրավասության դատարանի` Հակոբյանին դատապարտելու վերաբերյալ կայացրած վճիռը եւ նրան չի արդարացրել: Մյուս կողմը եւս դիմել էր Վերաքննիչ դատարան՝ պահանջելով ցմահ ազատազրկում Ստեփան Հակոբյանի նկատմամբ, այդ դիմումը եւս մերժվել է: