Քանի դեռ Հայաստանում չկա լեգիտիմ իշխանություն, այն անընդհատ էլ փորձելու են կառավարել Ռուսաստանի նման երկրները կամ հարկադրել միանալ այնպիսի միություններին, ինչպիսին Մաքսային միությունն է։ Այս մասին այսօր՝ սեպտեմբերի 3-ին Հայաստանի ՄՄ անդամակցության դեմ Երեւանում կայացած բողոքի երթի ժամանակ հայտարարեց Երեւանի ավագանու «Բարեւ Երեւան» խմբակցությն անդամ Դավիթ Սանասարյանը։ (ֆոտոռեպորտաժ)
Երթն սկսվեց Ազատության հրապարակից։ «No Putin, No Cry», «Go Home Putin, You are Drunk» գրությամբ պաստառներով մասնակիցները քայլեցին դեպի նախագահի նստավայր, որտեղ պատրաստվում են ընթերցել իրենց հայտարարությունը։
Երթի մասնակիցները հայտարարեցին, որ նախատեսում էին ակցիան անցկացնել ՌԴ վարչապետ Դմիտրի Մեդվեդեւի Հայաստան այցի ժամանակ, սակայն երբ պարզվեց, որ Մեդվեդեւը չի գալու, որոշեցին այն անցկացնել այսօր՝ ՌԴ նախագահ Վլադիմիր Պուտինի նախաձեռնած Մաքսային միությանն անդամակցելու՝ Հայաստանի ցանկության մասին նախագահ Սերժ Սարգսյանի հայտարարությունից ուղիղ մեկ տարի անց։
NEWS.am-ի թղթակիցը հաղորդում է, որ երթը նաեւ նպատակ ունի զորակցել քաղբանտարկյալներին, մասնավորապես՝ Շանթ Հարությանյանին ու նրա ընկերներին, որոնք նույնպես պայքարում են ռուսական ազդեցության դեմ եւ բազմիցս հայտարարել են, որ ռուսական ԿԳԲ-ի հրահանգով են ձերբակալվել։
Ակցիային մասնակցում է նաեւ Շանթ Հարությունյանի կինը՝ Ռուզաննա Բադալյանը, ու համախոհները, Ժուռնալիստների «Ասպարեզ» ակումբ ՀԿ-ի խորհրդի նախագահ Լեւոն Բարսեղյանը։