Համացանցում հայ-թուրքական հաշտեցման օգտին ստորագրահավաք է սկսվել: Փաստաթղթի տակ ստորագրել են թուրք, հայ եւ այլ գործիչներ: Ըստ «Our Common Dream» կայքի, ստորագրահավաքին մասնակցողները ցանկանում են երազել այն մասին, որ հայերի եւ թուրքերի միջեւ կսկսվի խաղաղության դարաշրջան, երբ կիշխի պատմության եւ յուրաքանչյուր ժողովրդի հանդեպ հարգանքը:
«Շատ երկար ժամանակ է Թուրքական Հանրապետության քաղաքական մշակույթը ձգտում պաշտպանել հանցագործությունը՝ արգելափակելով անցյալը եւ այդպիսով խոչընդոտելով իրավական կայուն պետության կառուցումը: Բայց ոչ ոք չի կարող ջնջել այն հրեշավոր իրադարձությունները, որոնք տեղի են ունեցել 1915 թվականին, ինչպես նաեւ դրանց հետեւանքները»,- ասված է ստորագրահավաքի տեքստում:
Այն ստորագրած գործիչները ցանկանում են երազել այն մասին, որ Թուրքիայում հարգելու են հայերի հիշատակը՝ որպես ցեղասպանության զոհերի, որ հայերը թուրքական քաղաքացիություն են ստանալու՝ բոլոր իրավասություններով: Նրանք նաեւ երազում են այն մասին, որ Թուրքիան կդադարեցնի Հայաստանի շրջափակումը եւ կբացի սահմանը, ինչպես նաեւ նրա համար հասանելի կդարձնի սեւծովյան նավամատույցները:
Ստորագրահավաքին արդեն միացել են սպանված լրագրող Հրանտ Դինքի եղբայրն ու կինը՝ Խոսրով եւ Ռաքել Դինքերը, փաստաբան Ֆեթհիյե Չեթինը, ֆրանսիացի դերասանուհի Արիան Ասկարիդը, ռեժիսոր Բրունո Ֆրեսսինեն, պատմաբան Էրվե Ժորժելենը եւ բազմաթիվ այլ գործիչներ տարբեր երկրներից: Ներկայում ստորագրահավաքին ավելի քան 160 մարդ է մասնակցել: