Հայաստանը երախտապարտ է Հունաստանին Օսմանյան Թուրքիայում հայերի եւ հույների ցեղասպանության ժխտումը քրեականացնող օրենքն ընդունելու համար: Այդ մասին այսօր՝ սեպտեմբերի 10-ին, լրագրողների հետ զրույցում հայտարարեց խորհրդարանի փոխնախագահ, իշխող Հանրապետական կուսակցության մամուլի քարտուղար Էդուարդ Շարմազանովը՝ նշելով, որ այսօր վերջինս հեռախոսազրույց է ունեցել Հունաստանի հայ-հունական բարեկամության խորհրդարանական խմբի նախագահ Ապոստոլոս Կակլամանսկու հետ եւ Հայաստանի խորհրդարանի անունից երախտագիտություն հայտնել:
Շարմազանովի խոսքով՝ այդ օրենքի ընդունումը ոչ միայն Հայոց ցեղասպանությունը դատապարտող քայլ է, այլ նաեւ նոր ցեղասպանությունների իրագործումը կանխող միջոց. «ՆԱՏՕ-ի գագաթաժողովի ընթացքում Թուրքիայի նախագահ հանդիպել է Հունաստանի վարչապետի եւ իր դժգոհությունը հատնել ցեղասպանության ժխտումը քրեականացնելու մասին օրինագծի կապակցությամբ, սակայն Թուրքիայի նախագահի ճնշումը ակնկալվող արդյունքը չի ունեցել»:
Ի պատասխան հարցին՝ Հունաստանի խորհրդարանի նախաձեռնությունը օրինակ կդառնա՞ արդյոք ֆրանսիացի պատգամավորների համար, Շարմազանովն ընդգծեց, որ ֆրանսիացի պատգամավորները վերջերս այցելել են Հայաստան եւ հավաստիացրել, որ չնայած Թուրքիայի ճնշմանը, օրենքը կընդունվի:
Հիշեցնենք, Հունաստանի խորհրդարանը երեկ՝ սեպտեմբերի 9-ին, ընդունել է անցած դարի սկզբում Օսմանյան Թուրքիայում Հայոց ցեղասպանությանը ժխտելու համար քրեական պատասխանատվության ենթարկելու մասին օրենքը:
Օրինագծին կողմ է քվեարկել 54, դեմ՝ 42, ձեռնպահ 3 պատգամավոր: «Հայերի կամ հույների ցեղասպանության հանդեպ անհարգալից կամ այն նվաստացնող ցանկացած փորձ պետք է դիտարկվի որպես հանցագործություն», - ասվում է փաստաթղթում: