ԱՄՆ Միջազգային զարգացման գործակալությունը (ԱՄՆ ՄԶԳ) եւ ՄԱԿ-ի Մանկական հիմնադրամը (ՅՈՒՆԻՍԵՖ) ստորագրեցին համագործակցության համաձայնագիր` իրականացնելու հնգամյա ծրագիր, որը կաջակցի ՀՀ Կառավարության՝ երեխաների խնամքի եւ պաշտպանության համակարգի բարեփոխմանը: Այս մասին News.am-ին հայտնեցին
Ծրագրի նպատակն է այլընտրանքային ընտանեկենտրոն խնամքի տարբերակները բարելավելու եւ համայնքահեն ծառայությունները զարգացնելու միջոցով դադարեցնել երեխաների ներհոսքը գիշերօթիկ խնամքի եւ հատուկ հանրակրթական հաստատություններ, ինչպես նաեւ այդ հաստատություններում գտնվող երեխաներին վերադարձնել ընտանեկան միջավայր:
Այլընտրանքային ծառայությունների բացակայության պատճառով Հայաստանում առկա երեխաների խնամքի եւ պաշտպանության համակարգը խրախուսում է հաշմանդամ երեխաների ծնողներին եւ տնտեսապես ծանր վիճակում գտնվող ընտանիքներին ուղարկել իրենց երեխաներին գիշերօթիկ հաստատություններ` ժամանակավոր, հաճախ նաեւ մշտական խնամքի համար: Համաձայն ՅՈՒՆԻՍԵՖ-ի կողմից իրականացված հետազոտության տվյալների` Հայաստանում երեխաների խնամք եւ պաշտպանություն իրականացնող 42 պետական եւ ոչ պետական հաստատություններում կա մոտ 4500 երեխա: Երեխաները բնակվում են երեք տեսակի հաստատություններում`մանկատներ, գիշերօթիկ հաստատություններ եւ հատուկ դպրոցներ: Այս երեխաների իննսունյոթ տոկոսը սոցիալապես անապահով ընտանիքներից են եւ ունեն առնվազն մեկ ծնող:
Գալիք հինգ տարիների ընթացքում գործընկերների համատեղ ջանքերը հնարավոր կդարձնեն գիշերային խնամքի թիրախային հաստատությունների երեխաների սոցիալական ներգրավումը եւ ծառայությունների ու հնարավորությունների հավասար հասանելիությունը: Ապաինստիտուցիոնալացումը կհանգեցնի գիշերօթիկ խնամքի աստիճանական վերացմանը եւ Հայաստանի քաղաքացիների համար հասանելի ու համապատասխանորեն մշակված ընտանեկենտրոն խնամքի եւ համայնքահեն ծառայությունների զարգացմանը:
