Կոտայքի մարզում այսօր՝ սեպտեմբերի 13-ին, տեղի ունեցած ավտովթարի հետաւանքով մահացած 36-ամյա Արփինեն եւ վիրավորված 26-ամյա Աղաբեկը նույն մարզի Մրգաշեն համայնքից են, խնամիներ: Այս մասին NEWS.am-ին ասաց համայնքի ղեկավար Արամայիս Արամյանը:
Նրա խոսքով՝ Արփինեն եւ Աղաբեկը Նոր Հաճնից վերադառնալիս են եղել, երբ մեքենան դուրս է եկել երթեւեկելի հատվածից եւ շրջվել:
«Արփինեն 2 երեխա ունի. աղջիկը 17 տարեկան է, ամուսնացել է Աղաբեկի բարեկամի հետ, տղան էլ դպրոցական է: Աղաբեկն էլ 2 տարի առաջ է ամուսնացել, փոքրիկ երեխա ունի, ինքն էլ վերջերս էր Ռուսաստանից վերադարձել»,- ասաց գյուղապետը՝ նշելով, որ Աղաբեկին տեղափոխել են «Արմենիա» բժշկական կենտրոնի վերակենդանացման բաժանմունք:
Ավելի վաղ NEWS.am-ը հայտնել էր, որ ժամը 15:30-ին ԱԻՆ-ում ահազանգ է ստացվել, որ Կոտայքի մարզի Քանաքեռավան գյուղի վերջնամասում տեղի է ունեցել ՃՏՊ, կա տուժած. անհրաժեշտ է փրկարարների օգնությունը: Պարզվել է, որ «ԲՄՎ» մակնիշի 35 TL 021 պետհամարանիշով ավտոմեքենան դուրս է եկել ճանապարհի երթևեկելի հատվածից և շրջվել, ինչի հետևանքով ուղևորը` 1978 թ. ծնված Արփինե Ա.-ը, տեղում մահացել է, իսկ վարորդը` 1988 թ. ծնված Աղաբեկ Հ.-ը, հոսպիտալացվել է «Արմենիա» հանրապետական բժշկական կենտրոն:
