Հայաստանում ԱՄՆ-ի արտակարգ եւ լիազոր դեսպան Ջոն Ա. Հեֆերնը, Լիտվիայի Հանրապետության արտակարգ եւ լիազոր դեսպան Էրիկաս Պետրիկասը, ԱՄՆ դեսպանատան ավելի քան 20 աշխատակիցներն այսօր՝ սեպտեմբերի 13-ին, Վանաձորում օգնեցին շուրջ 26 տարի վագոն-տնակներում ապրող 8 ընտանիքների կառուցել իրենց տները:
Հայաստանի «Ֆուլեր Տնաշինական Կենտրոն»-ի մամուլի ծառայությունից տեղեկանում ենք, որ մասնակիցները բազմաբնակարան շենքի հատակի բետոնացման աշխատանքներ են իրականացրել: Ընտանիքներից մեկի՝ Ոսկանյանների բնակարանի կառուցումը մասամբ ֆինանսավորվել է Հայ-Բրիտանական առեւտրի պալատի «Բրնսի ընթրիք» (Burns Supper) միջոցառման շրջանակներում կատարված հանգանակության միջոցով:
«Երկար ու անհույս տարիներ ես ու իմ ընտանիքը ապրել ենք մետաղական տնակում: Վատ կենցաղային պայմաններն ազդել են իմ որդու՝ Ավետիքի առողջության վրա, ով տառապում է հիդրոցեֆալիա հիվանդությամբ: Նա արդեն վիրահատվել է երեք անգամ, եւս երկու վիրահատություն դեռ առջեւում է: Ես երազել անգամ չէի կարող, որ մի օր իմ ընտանիքն էլ կունենա իր հարմարավետ անկյունը: Հիմա ես տեսնում եմ, թե ինչպես է իմ եւ իմ բախտակիցների երազանքն իրականություն դառնում: Մենք այնքան երջանիկ ենք, որ մեր երեխաները շուտով կապրեն ավելի լավ պայմաններում, քան մենք ենք ապրել: Շնորհակալ ու շնորհապարտ եմ այս ծրագրին, այս մարդկանց, որ այսօր եկել ու օգնության ձեռք են մեկնել մեզ՝ օր առաջ կառուցելու եւ ավարտին հասցնելու մեր երազանքների տունը»,- ասաց Տարոն 3-րդ թաղամասի ապագա բնակչուհի Տաթեւիկ Ոսկանյանը:
Հայաստանում ԱՄՆ դեսպան Ջոն Հեֆերնն էլ իր հերթին նշել է, որ անհամբեր սպասում էին Վանաձորի ընտանիքներին օգնելու հնարավորությանը: